Uppfært: Tilraunaskotinu hefur verið frestað fram á laugardag.
Upprunalega stóð til að reyna aftur tiltölulega fljótt en flugmálayfirvöld kröfðust umbóta og skikkuðu starfsmenn SpaceX til að uppfylla ákveðin skilyrði áður en þeir máttu reyna aftur. Þessi skilyrði snerust meðal annars að skotpalli Starship, sem þurfti að styrkja, en hefur verið náð, samkvæmt frétt Ars Technica.
Starship-kerfið samanstendur af gríðarstórri eldflaug og af um fimmtíu metra löngu geimfari sem ber nafnið Starship. Bæði stig kerfisins eru hönnuð til að geta verið notuð mjög hratt aftur, eins og SpaceX hefur gert með Falcon-eldflaugarnar.
Sjá einnig: Sprengdu Starship eftir bilun í aðskilnaðarbúnaði
Saman sett er stæðan 120 metrar á hæð. Super Heavy eldflaugin er búin 33 Raptor hreyflum sem brenna metan og fljótandi súrefni.
Starship preparing to launch as early as November 17, pending final regulatory approval https://t.co/bJFjLCiTbK pic.twitter.com/qRKv9ugWsR
— SpaceX (@SpaceX) November 11, 2023
Starship á að vera grunnurinn að framtíð SpaceX. Með því að þróa fullkomlega endurnýtanlega eldflaug og geimfar gæti fyrirtækið dregið enn frekar úr kostnaði við geimskot og framkvæmt þau mun oftar en samkeppnisaðilar. Nota á Starship og Super Heavy til að flytja menn og birgðir til tunglsins og jafnvel lengra út í geim með mun minni tilkostnaði en aðrir geta gert.
Sjá einnig: NASA semur við SpaceX um að lenda geimförum aftur á tunglinu
Skotglugginn svokallaði opnast klukkan eitt á morgun (föstudag), eða skömmu eftir sólarupprás í Texas, og verður opinn í tvær klukkustundir. Veðurskilyrði eru sögð líta vel út, að svo stöddu. Sýnt verður frá geimskotinu í beinni útsendingu á Vísi á morgun.
Lendir í sjónum við Havaí
Fari allt eftir ætlunum munu Super Heavy eldflaugin bera Starship í um tvær og hálfa mínútu, áður en aðskilnaður fer fram og eldflaugin snýr við og lendir í Mexíkóflóa. Eins og síðast stendur ekki til að reyna að lenda eldflauginni á jörðinni, heldur í sjónum undan ströndum Texas.
Geimfarið mun halda áfram eftir aðskilnaðinn og fara næstum því á braut um jörðu. Starship á að fljúga áfram þar til það lendir í sjónum við Havaí í Kyrrahafinu.
Síðast þegar þetta var reynt, í apríl, sprakk Starship í loft upp. Eldflaugin tók á loft en ekki tókst að aðskilja geimfarið frá eldflauginni svo öll stæðan snerist í hringi í háloftunum. Öryggisbúnaður geimfarsins sprengdi það í loft upp.
Sjá má tilraunaskotið í apríl í spilaranum hér að neðan.
Þrátt fyrir að stæðan hafi sprungið í loft upp segja starfsmenn SpaceX að tilraunaskotið hafi hjálpað mikið og í raun verið vel heppnað. Alltaf þóttu nokkuð miklar líkur á því að fyrsta tilraunaskotið endaði með sprengingu.
Síðan þá segja forsvarsmenn SpaceX að ýmsar endurbætur hafi verið gerðar á Starship. Í yfirlýsingu sem birt var í september segir að meðal þessara endurbóta séu breytingar á hugbúnaði og öryggiskerfi Starship, betri aðskilnaðarbúnaður og að endurbætur hafi verið gerðar á Raptor-hreyflum Super Heavy, svo eitthvað sé nefnt.
