Hvetur Zlatan til að snúa aftur á Old Trafford

Paul Ince, fyrrum leikmaður Manchester United, vill sjá Zlatan Ibrahimovic snúa aftur á Old Trafford og segir hann leiðtogann sem vantar í búningsklefann.

Svíinn er að yfirgefa MLS deildina eftir tvö ár hjá LA Galaxy og ekki er vitað hvað tekur við hjá honum. Hann hefur íjað að endurkomu til Spánar en samkvæmt Ince ætti hann að íhuga að fara aftur til Englands.

„Zlatan hefur gefið í skyn að hann sé að fara til Spánar, hann hefur verið orðaður við að vera áfram í MLS og jafnvel Perth Glory,“ sagði Ince.

„En ég held að ef hann hefur áhug á því þá væri rétta skrefið að fara aftur á Old Trafford.“

„Hann yrði frábær í því að kenna öllum þessum ungu leikmönnum sem Ole er að ala upp. Hann hefur frábær áhrif utan vallar sem innan.“

Zlatan spilaði fyrir Manchester United á árunum 2016-2018. Hann skoraði 29 mörk í 53 leikjum fyrir félagið og vann Evrópudeildina og ensak deildarbikarinn með United.