Út­sendarar GRU sagðir hafa sent eldsprengjur með flug­vélum

Eldsprengjurnar sprungu í tveimur húsum DHL í júlí. Önnur í Leipzig í Þýskalandi og hin í Birmingham Englandi. Litlu munaði að pakkarnir sem innihéldu sprengjurnar hefðu verið komnir um borð í flugvélar.

Samkvæmt heimildarmönnum Wall Street Journal hófst þá strax alþjóðleg leit að sökudólgunum og hafa spjótin nú beinst að rússneskum útsendurum.

Rannsakendur og starfsmenn leyniþjónusta í Evrópu segja sprengjurnar hafa verið gerðar úr nuddtækjum sem komið var fyrir kveikibúnaði í. Pakkarnir tveir voru sendir frá Litháen og er talið að fyrstu tveir hafi verið tilraun varðandi það hvernig hægt væri að koma svona pökkum um borð í flugvélar til Bandaríkjanna.

Lögregluþjónar í Þýskalandi eru sagðir hafa kannað sambærilegar eldsprengjur. Þær ku hafa innihaldið magnesíum, sem myndi gera fólki erfitt að slökkva eldinn með þeim slökkvitækjum sem finna má í flugvélum.

Þess vegna væri neyðarlending mögulega eini kosturinn í stöðunni en slíkt gæti eðli málsins samkvæmt reynst erfitt yfir Atlantshafi.

Sjá einnig: Út­sendarar Rússa sakaðir um skipu­lagningu á­rása í Þýska­landi

WSJ hefur eftir yfirmanni einnar af leyniþjónustum Þýskalands að tilviljun hafi valdið því að ekki hafi kviknað í sprengjunum um borð í flugvélum. Það væri sökum þess að tafir hefðu orðið á einu flugi.

Spjótin beinast að GRU

Fjórir menn hafa verið handteknir í Póllandi vegna rannsóknarinnar og eru yfirvöld þar að leita að minnsta kosti tveggja manna til viðbótar, sem taldir eru halda til í öðrum ríkjum.

Þá er haft eftir Pawel Szota, yfirmanni einnar af leyniþjónustum Póllands, að rússneskum njósnurum sé um að kenna. Hann segir einnig að ef árás af þessu tagi hefði heppnast hefði verið um gífurlega stigmögnun að ræða.

„Ég er ekki viss um að pólitískir leiðtogar Rússlands séu meðvitaðir um afleiðingar þess ef einn þessara pakka hefði sprungið og valdið miklu mannfalli.“

Aðrir heimildarmenn WSJ hafa einnig bent á Rússa og þá sérstaklega GRU, leyniþjónustu rússneska hersins.

GRU sér að mestu um njósnir og annarskonar leynilegar aðgerðir Rússa á erlendri grundu. Leyniþjónustan FSB, sér um aðgerðir í Rússlandi og öðrum nærliggjandi ríkjum.

Útsendarar GRU hafa verið nokkuð umsvifamiklir í Evrópu á undanförnum árum. Þeir eru meðal annars grunaðir um að hafa eitrað fyrir Skripal, feðginunum, um ýmsar tölvuárásir og skemmdarverk í Evrópu.

Ken McCallum, yfirmaður bresku leyniþjónustunnar MI5, sagði á dögunum að starfsmenn leyniþjónusta Rússlands reyndu sífellt að valda usla á götum Evrópu og sagði hann útsendara GRU vera sérstaklega kræfa.

Í mörgum tilfellum reyndu Rússar að leita til Glæpasamtaka og reyndu að fá meðlimi þeirra til að fremja myrkraverk þeirra. Það mætti að einhverju leyti rekja til þess hve mörkum rússneskum erindrekum, og þar á meðal njósnurum, hefði verið vísað frá Evrópu á undanförnum árum.

Sjá einnig: Segir Rússa reyna að skapa usla á götum Evrópu

Á undanförnum árum hafa Rússar einnig verið sakaðir um íkveikjur í Bretlandi og Tékklandi og árásir á pípur og ljósleiðara, auk þess sem þeir eru sagðir hafa átt við neysluvatn í Svíþjóð og Finnlandi.

Þá voru Rússar fyrr á þessu ári sakaðir um ráðabrugg um að ráða forstjóra Rheinmetall, stærsta hergagnaframleiðanda Evrópu, af dögum.