Boðar sam­tök sendla eftir fýlufund með Wolt: „Og það verður stórt verk­fall“

Gheorghe Mihai Cacaliceanu, sem kallar sig talsmann Wolt-sendla, segir í samtali við Vísi að Wolt hafi boðið sendlum á fund í dag. Stjórnendur frá höfuðstöðvum fyrirtækisins í Finnlandi hafi komið til Íslands til að ræða við sendlana og Gheorghe segir að um 25 sendlar hafi mætt á fundinn.

„Við bjuggumst við því að fá að ræða um okkar kröfur og öll þau vandamál sem við höfum vakið athygli á, en þau hefja fundinn á því að sýna okkur hvernig Wolt-forritið og algrímið virkar og útskýra hvernig þau telji að við séum að fá góð laun,“ bætir hann við. 

„Við vitum alveg hvernig við fáum greitt. Ég held að við vitum það betur en þau.“

Fyrir rúmum mánuði lögðu sendlar hjá Wolt tímabundið niður störf, mótmæltu við skrifstofur fyrirtækisins og vísuðu til þess að laun þeirra hefðu verið lækkuð um fjörutíu prósent á einu ári. Samkvæmt upplýsingum fréttastofu nam lágmarksgreiðslan áður um eitt þúsund krónum en hljóðar nú upp á sex hundruð krónur fyrir hverja sendingu.

Gheorghe vill meina að stjórnendur hafi ekki hlustað á kröfur sendla á fundinum í dag. Sendlar hafi fengið þau svör að það væri þeirra val að vinna fyrir Wolt eða ekki og ef þeim litist ekki á kjörin gætu þeir unnið annars staðar.

Gheorghe segir að sendlarnir hafi flestir gengið af fundinum þegar um 45 mínútur voru liðnar.

Að undanförnu hafa Wolt-sendlar unnið með stéttarfélaginu Eflingu og Gheorghe segir að sendlar á Íslandi muni á næstu dögum skipuleggja sig enn frekar.

„Við erum að skipuleggja í samstarfi við Eflingu og félög Wolt-sendla í Danmörku og Noregi til þess að koma á fót eins konar samtökum fyrir Wolt-sendla á Íslandi,“ segir hann.

Þar sem Wolt-sendlar eru skilgreindir sem verktakar en ekki launþegar semur Wolt ekki við stéttarfélög hvað þeirra kjör varðar. Sendlar í Skandinavíu hafa þó myndað smærri samtök á borð við Wolt Workers Group í Kaupmannahöfn og hafa þeir einnig notið stuðnings stærri stéttarfélaga, svo sem 3F í Danmörku eða Fellesforbundet í Noregi.

Hingað til hefur hópur sendla á Íslandi aðallega skipulagt sig í gegnum óformlegan WhatsApp-spjallhóp.

Gheorghe segir að Efling sé sendlum innan handar, einkum hvað lagaleg atriði varðar, svo að samtökin geti veitt þeim vernd ef þeir leggja niður störf. Þegar samtökin hafa verið stofnuð ætli sendlarnir í verkfall.

„Og það verður stórt verkfall,“ segir Wolt-sendillinn.