Högnuðust vel á fjórðungnum en reiknað með tapi á árinu

Kemur þetta fram í uppgjöri fyrir ársfjórðunginn en þar er einnig haft eftir Boga Nils Bogasyni, forstjóra flugfélagsins, að reksturinn sé á réttri leið þrátt fyrir margt sem hafði neikvæð áhrif á afkomuna.

Skili árangri

„Rekstur Icelandair var sterkur í fjórðungnum og við náðum góðum árangri í kjarnastarfseminni þrátt fyrir sögulega hátt eldsneytisverð, óhagstæða gengisþróun og verkfallsaðgerðir sem höfðu neikvæð áhrif á afkomuna. EBIT rekstrarbati, mettekjur og sterk lausafjárstaða sýna að rekstur félagsins er á réttri leið. Á sama tíma eru þær breytingar sem við erum að gera þvert á félagið að skila raunverulegum árangri sem sést víða í rekstrinum,“ er haft eftir honum.

Þá segir einnig að mettekjur á ársfjórðungnum hafi aukist um 12 prósent og séu að fjárhæð 80,5 milljarðar króna en í uppgjörinu er snert á þeim áhrifum sem verkfall Flugvirkjafélags Íslands hafi haft. Þau hafi verið neikvæð og valdið því að afkoman væri 500 milljónum minni en ella.

Ná samningum sé lykilþáttur

„Í ljósi viðvarandi áskorana í rekstrarumhverfinu, hás eldsneytisverðs og óhagstæðrar gengisþróunar fyrir útflutningsfyrirtæki á Íslandi, gerum við ráð fyrir að tap verði á fjórða ársfjórðungi og á árinu í heild,“ er haft eftir Boga en fram kemur í uppgjörinu að gert sé ráð fyrir því að afkoma ársins fyrir árið í heild verði neikvæð sem nemi um 2,5 til 3,7 milljörðum króna.

Því sé áhersla stjórnarinnar fyrst og fremst á að hagræða í rekstrinum, einfalda fyrirtækið og auka skilvirkni.

„Að ná samningum við flugstéttirnar á sjálfbærum grunni og þar með tryggja eftirsótt störf í flugrekstri á Íslandi er lykilþáttur á þessari vegferð,“ kemur þar jafnframt fram.

Á sama tíma sé haldið áfram að gera breytingar á félaginu og sé endurnýjun flotans og undirbúningur við komu A321XLR-vélanna hluti af því.

„Markmið okkar er skýrt: að byggja upp einfaldara og skilvirkara félag sem er vel í stakk búið til að nýta ný tækifæri þegar aðstæður batna. Fjárhagsstaða félagsins er traust og er lausafjárstaðan enn betri en á sama tíma í fyrra, sem er sterkur grunnur til að byggja á,“ er haft eftir Boga.

Punktar úr uppgjörinu fyrir þriðja ársfjórðung 2026:

• Met tekjur að fjárhæð 80,5 milljarðar króna, aukning um 12%
• EBIT 14,8 milljarðar króna, bæting um 5,7 milljarða króna. EBIT hlutfall hækkaði í 18,4% úr 12,7%
• Afkoman batnaði þrátt fyrir 1,6 milljarða króna hækkun eldsneytiskostnaðar á milli ára að teknu tilliti til áhrifa eldsneytisvarna
• Einingatekjur jukust um 18% sem endurspeglar 17% hækkun á tekjum á hvern seldan sætiskílómetra (e. yield) og bætta sætanýtingu um 0,6 prósentustig
• Einingakostnaður hækkaði um 10%, aðallega vegna hás eldsneytisverðs
• Verkfall Flugvirkjafélags Íslands hafði neikvæð áhrif á EBIT sem nam um 500 milljónum króna
• Hagnaður eftir skatta nam 11,8 milljörðum króna samanborið við 7,0 milljarða króna á síðasta ári
• Lausafjárstaða var 66,7 milljarðar króna í lok fjórðungsins, aukning um 5,4 milljarða króna samanborið við 3. ársfjórðung 2025
• Horfur fyrir fjórða ársfjórðung eru krefjandi og búist er við að áframhaldandi kostnaðarhækkanir, sérstaklega hækkun eldsneytisverðs muni hafa áhrif á afkomuna
• Gert er ráð fyrir að EBIT fyrir árið í heild verði neikvæð sem nemur 2,5-3,7 milljörðum króna (20-30 milljónum USD)