Töluðu saman í klukku­tíma

Forsetarnir töluðu saman í síma í dag en símtalið mun hafa staðið yfir í rúma klukkustund, samkvæmt Júrí Úsjakóv, aðstoðarmanni og ráðgjafa Pútíns. Úsjakóv sagði Trump hafa ítrekað fyrir Pútín að „gífurlegur ávinningur“ væri mögulegur í því að efla samskipti Bandaríkjanna og Rússlands.

Hvíta húsið hefur ekki gefið upp neinar upplýsingar um símtalið né staðfest að það hafi átt sér stað.

Í frétt Moscow Times er haft eftir Úsjakóv að Pútín hafi upplýst Trump um ítarlega og huglæga greiningu hans á stöðunni á víglínunni í Úkraínu, markmiðum Rússa og hvernig þeir myndu ná þeim fram.

Þá segir í frétt rússnesku fréttaveitunnar RIA að Pútín hafi staðhæft við Trump að Rússar hefðu engar ætlanir um að ráðast með nokkrum hætti að öðrum ríkjum Evrópu.

Úsjakóv sagði að þær sögusagnir sem verið væri að dreifa um ógnina frá Rússlandi í Evrópu væru til þess ætlaðar að ýta undir stuðning við Úkraínu og aukin fjárútlát til varnarmála.

Rússar hafa verið sakaðir um að bera ábyrgð á fjölda fjölþáttaógna og árása í Evrópu á undanförnum mánuðum og árum.

Margir leiðtogar í Evrópu vöruðu nýverið við því að hegðun Rússa yrði sífellt glannalegri. Bregðast yrði við þessu „nýja ástandi“.

Símtalið var „trúnaðarmál“

Pútín tók um helgina á móti þeim Jared Kushner og Steve Witkoff, tengdasyni og vini Trumps, og ræddi við þá um stöðuna í Úkraínu. Í kjölfarið fóru þeir til Úkraínu og ræddu við ráðamenn þar. Eins og segir í frétt Reuters er fátt sem bendir til þess að mikill árangur hafi náðst með þessum viðræðum en þær gætu á endanum leitt til þess að viðræður hefjist formlega á nýjan leik.

Sjá einnig: „Þeir eru á ómögulega slæmum stað“

Úsjakóv sagði blaðamönnum í Rússlandi að Pútín hefði sagt Trump að Bandaríkin gætu hjálpað við að binda enda á stríðið. Hann vildi þó ekki fara nánar út í hvað hann ætti við, þar sem símtalið væri „trúnaðarmál“.

Með sömu kröfurnar

Stutt er síðan Pútín sagði opinberlega að hann myndi ekki ræða við „hryðjuverkamenn“ í Kænugarði. Hann vildi þess í stað ræða við Bandaríkjamenn um „langvarandi frið“.

Þegar Pútín og ráðamenn hans hafa áður talað um frið til langs tíma eða „rætur átakanna“, eins og forsetinn gerði í morgun, hafa þeir verið að vísa til krafna Rússa um að ríkjum Austur-Evrópu verði í raun vísað úr Atlantshafsbandalaginu. Það eru kröfurnar sem þeir lögðu fram fyrir innrásina 2022.

Það er fátt sem bendir til þess að Pútín hafi á einhverjum tímapunkti látið af markmiðum sínum með innrásinni í Úkraínu. Þau eru að útiloka alfarið aðild ríkisins að Atlantshafsbandalaginu (NATO), að takmarka verulega stærð herafla landsins og það að NATO hörfi alfarið frá Austur-Evrópu, eins og Pútín gerði ljóst í aðdraganda innrásarinnar.

Þessa dagana setja Rússar langmestan kraft í að reyna að hernema restina af Donbas-svæðinu svokallaða, sem myndað er af Dónetsk og Lúhansk. Úkraínumenn stjórna enn tiltölulega umfangsmiklu svæði í Dónetsk en það eru þeir sagðir hafa víggirt mjög á undanförnum árum og er svæðið kallað „Virkisbeltið“.