Boðar fleiri á­rásir

„Við gerðum mjög harðar árásir í gær, mjög mjög harðar,“ sagði Trump á fundinum sem Vólodimír Selenskí Úkraínuforseti var einnig viðstaddur.

„Ég gaf þeim smá viðvörun, við erum að fara gera mjög harðar árásir aftur í kvöld.“

Aðgerðastjórn Bandaríkjahers (CENTCOM) tilkynnti í gærkvöldi að herinn hefði hafið árásir á nýjan leik á Íran. Um væri að ræða hefndaraðgerð við árásum Írana sem hefðu ráðist á þrjú skip á Hormússundi.

Trump sagði einnig á blaðamannafundinum að hann væri ekki ánægður með Írani og ítrekaði áðurnefnda kröfu sína um að Íranir mættu ekki eiga kjarnorkuvopn. Hann hefði þegar unnið hart að því að koma í veg fyrir slíkt.

Einnig sagði Trump að Íranir væru ekki lengur eineltisseggir Miðausturlanda heldur væru leiðtogar þeirra „ruglaðir“.

Svindlarar og lygarar

Aðspurður hvort orð hans um að viðræður um vopnahlé á milli Írans og Bandaríkjanna væru runnin í sandinn þýddu að fram undan væru stórtæk stríðsátök milli ríkjanna tveggja svaraði hann óbeint.

Þess í stað sakaði hann Íran um að brjóta gegn vopnahléssamkomulaginu á hverjum degi og að þeir væru bæði að ljúga og svindla.

„Þeir munu aldrei byggja kjarnorkuvopn á meðan samningurinn okkar er í gildi, en ég veit ekki hvort við munum ná samkomulagi. Við munum kannski gera það án samnings því þú veist, það er auðveldara,“ sagði forsetinn.