Segjast hafa skotið niður aðra banda­ríska her­flug­vél

Þetta hefur Reuters eftir Íransher en Bandaríkjaher hefur ekkert staðfest. Íranski fréttamiðillinn Tasnim birtir myndir af því sem virðist vera brak úr bandarískri herflugvél. Með fylgja þær upplýsingar að íranski herinn hafi skotið hana niður yfir miðhluta Íran. Ekki kemur fram af hvaða gerð flugvélin er en í fréttavakt Al Jazeera koma fram óstaðfestar upplýsingar frá hernum um að flugvélin sé af gerðinni F-35.

Í síðasta mánuði sendi Bandaríkjaher frá sér yfirlýsingu um að F-35 flugvél hefði nauðlent eftir að hafa sinnt verkefni í landhelgi Íran. Ástand áhafnarinnar væri stöðugt. 

Árásir Írana og Ísraela héldu áfram í dag en Íranir skutu meðal annars eldflaugum að skotmörkum í Ísrael og Barein í dag. Þá skaut herinn drónum að olíuhreinsunarstöð í Kúveit, með þeim afleiðingum að eldur kviknaði í henni, í dag.

Á sama tíma tilkynnti Rauði hálfmáninn í Íran að dróni hefði hæft vöruhús í suðurhluta Íran í dag sem hýsi hjálpargögn og neyðarbíla. Ekki liggur fyrir hvaðan drónarnir komu.