Íranir búa sig undir á­rásir landherliðs

„Svo lengi sem Bandaríkjamenn leitast eftir uppgjöf Íran látum við ekki niðurlægja okkur,“ sagði Mohammad Baqer Qalibaf forseti þingsins er hann ávarpaði írönsku þjóðina í dag. 

Hann sagði íranskar hersveitir bíða þess að bandarískir hermenn komi inn í landið svo þær geti „látið byssuskotum rigna yfir þá“.

Bandaríkin ekki staðfest neitt

Mörg þúsund landgönguliðar héldu í átt að Mið-Austurlöndum um borð í árásarskipum á undanförnum dögum. Washington Post hafði eftir heimildarmönnum í vikunni að varnarmálaráðuneyti Bandaríkjanna væri að undirbúa margra vikna aðgerðir á jörðu niðri í Íran, þar með taldar árásir fótgönguliða. 

Óvíst væri þó hvort Donald Trump Bandaríkjaforseti féllist á að senda fótgönguliða inn í landið. Marco Rubio utanríkisráðherra Bandaríkjanna hefur áður sagt Bandaríkin geta náð markmiðum sínum án þess að senda landgönguliða inn í Íran en til að auka sveigjanleika hafi verið ákveðið að senda herlið á svæðið. 

Enn skotið á víxl

Utanríkisráðherrar Pakistan, Sádi-Arabíu, Tyrklands og Egyptalands funda í Islamabad í Pakistan í dag í von um að finna leiðir til að koma böndum á átökin sem staðið hafa yfir í meira en mánuð. Engin lausn virðist þó í sjónmáli eins og staðan er núna. 

Í umfjöllun Reuters segir að Íranir og Ísraelar hafi haldið áfram árásum á víxl í dag. Hútar í Jemen, sem eru hliðhollir Íransstjórn, blönduðu sér í átökin í gær í fyrsta sinn á undanförnum mánuði þegar þeir skutu eldflaugum og drónum að suðurhluta Ísrael. 

Þá felldi Ísraelsher þrjá blaðamenn í Líbanon og gaf þær skýringar að einn þeirra væri hryðjuverkamaður með tengsl við Hezbollah-samtökin, sem einnig eru hliðholl Íransstjórn.