Viðskipti innlent

Bird skellt í lás

Oddur Ævar Gunnarsson skrifar
Bird var þekktur fyrir líflega tónleika á þeim stutta tíma sem staðurinn var opinn.
Bird var þekktur fyrir líflega tónleika á þeim stutta tíma sem staðurinn var opinn. Vísir/Anton Brink

Skemmtistaðnum Bird á horni Tryggvagötu og Hafnarstrætis í miðbæ Reykjavíkur var skellt í lás í síðasta sinn í gærkvöldi. Um eitt og hálft ár er síðan staðurinn opnaði í því sem áður höfðu verið húsakynni Frederiksen.

Tilkynnt er um lokun staðarins á samfélagsmiðlinum Facebook en Vísir hefur ekki náð tali af forsvarsmönnum staðarins. Á miðlinum er greint frá því að Bird skelli í lás og að það hafi átt að gera með látum. Átta bönd hafi stigið á svið í gærkvöldi og voru velunnarar staðarins hvattir til að mæta og fagna síðasta kvöldinu.

Gestir voru hvattir til að mæta og fagna lokakvöldinu með eigendum staðarins.Vísir/Anton Brink

Kjartan Óli Ólafsson einn eigenda Bird sagði í samtali við fréttastofu þegar staðurinn opnaði að hann yrði stútfullur af lifandi tónleikum og plötusnúðum. Auk þess byði staðurinn upp á bestu samlokur staðarins sem eldaðar voru á staðnum.

Í húsakynnum Bird var áður veitingastaðurinn og knæpan Frederiksen Ale House sem opnaði þar 2014 og var því rekin þar um tíu ára skeið. Rekstraraðili staðarins sagði í samtali við fréttastofu að reksturinn hefði gengið vel framan af en að gatnaframkvæmdir og heimsfaraldur hefðu sett strik í reikninginn.

Veitingamenn hafa sagst vera uggandi yfir æ erfiðari rekstrarskilyrðum. Bird bætist nú hóp staða líkt og Brewdog og Bankans bistró sem báðir hafa lagt upp laupana á þessu ári eftir nokkurra ára rekstur.

Staðurinn hýsti líflega tónleika og bauð einnig upp á karaokíherbergi. Vísir/Anton Brink
Veitingastaðir Reykjavík

Tengdar fréttir

Frederiksen víkur fyrir Bird

Barinn Frederiksen á horni Tryggvagötu og Naustanna skellir í lás fyrir fullt og allt. Reksturinn hefur verið seldur og nýr staður tekur við á næstunni. Stella Þórðardóttir, eigandi Frederiksen, segir þreytu komna í mannskapinn eftir tíu góð ár af rekstri.

Veitingamenn uggandi yfir erfiðum rekstrarskilyrðum

Veitingamenn eru uggandi yfir æ erfiðari rekstrarskilyrðum. Talsmaður þeirra segir ekki lengur hægt að una við núverandi stöðu og hvetur stjórnvöld til að lækka álögur á áfengissölu veitingahúsa.



Mest lesið


Fleiri fréttir

Sjá meira


×

Mest lesið