Gjör­breyttur Luka hefur tekið á því í ræktinni

Hinn 26 ára gamli Dončić er 1.98 metri á hæð og var samkvæmt Lakers 104 kílógrömm þegar hann mætti þangað frá Dallas Mavericks í óvæntustu félagaskiptum síðari ára ef ekki allra tíma.

Þó Lakers hafi skráð Luka sem 104 kíló voru sögusagnir þess efnis að hann hefði verið allt að 122 kíló þegar hann spilaði fyrir Dallas. Þegar Slóvenanum var skipt til Lakers gaf Dallas opinverlega út að félagið hefði áhyggjur af ásigkomulagi og mataræði leikmannsins.

Hann virðist hafa tekið því persónulega ef marka má forsíðu mynd tímaritsins Men´s Health. Þar sést tággrannur Luka leika sér með lóð frekar en körfubolta.

Samkvæmt Men´s Health hefur Luka æft stíft síðan Lakers féll úr leik gegn Minnesota Timberwolves í 1. umferð úrslitakeppni NBA-deildarinnar. Um er að ræða tvær 90 mínútna æfingar á dag ásamt því að hann hefur verið duglegur að spila padel.

Lakers mætir með talsvert breytt lið á komandi leiktíð en félagið hefur samið við Jake LaRavia, DeAndre Ayton og Marcus Smart. Þá fór Dorian Finney-Smith til Houston Rockets.

Þá birti Misko Raznatovic, umboðsmaður miðherjans magnaða Nikola Jokić, nokkuð óskýra mynd af sér á bát ásamt LeBron James og viðskiptafélaga hans Maverick Carter. Mögulega voru þeir að ræða hesta en myndin vakti athygli.

Samningur Jokić við Denver Nuggets rennur út á næsta ári en hann hafnaði framlengingu á samningi fyrr í sumar. Hann getur þó framlengt við félagið næsta sumar fyrir talsvert hærri upphæð.