Róðurinn þungur en hefur ekki á­hyggjur af Play

Play greindi frá því í gær að félagið geri ráð fyrir tapi upp á tæpa tvo milljarða á síðasta ársfjórðungi samanborið við 1,2 milljarða króna tap á sama tímabili í fyrra. 

Gengisstyrking með ólíkindum og minni eftirspurn eftir embættistöku

Snorri Jakobson, hlutabréfagreinandi og eigandi Jakobsson capital, segir afkomuviðvörunina einkum skýrast af tveimur þáttum.

„Það er alveg ljóst að gengisstyrking krónunnar núna á öðrum ársfjórðungi hefur farið mjög illa í flugfélögin og dregið úr samkeppnishæfni flugfélaganna, og almennt samkeppnishæfni Íslands. Það er sú ályktun sem maður getur dregið út úr uppgjörum flugfélaganna. Svo ef maður horfir á sjávarútveginn þá er útlit fyrir aflabrest, lélega loðnuúthlutun og flestir nytjastofnar bolfisks, það verður samdráttur þar. Svo þessi gengisstyrking núna í vor var með miklum ólíkindum.“

Þá segir hann að með síðari embættistöku Donalds Trump Bandaríkjaforseta hafi dregið úr eftirspurn eftir flugi yfir Atlantshafið, bæði hvað varðar flug milli Íslands og Bandaríkjanna og Evrópu og Bandaríkjanna. Þetta geri íslensku flugfélögunum tveimur erfiðara um vik.

„Það er líka að koma við afkomu flugfélaganna á öðrum ársfjórðungi. Flestir höfðu gert ráð fyrir að það yrði næsta vetur en það er greinilegt að það hafði áhrif á öðrum ársfjórðungi líka, sem fæstir bjuggust við.“

Gengishrun endurspegli ekki raunverulegt virði

Gengi hlutabréfa í félaginu hefur lækkað um tugi prósenta það sem af er morgni og stendur í fjörutíu aurum á hlut þegar þessi frétt er skrifuð. Við lokun markaða í gær stóð gengið í sextíu aurum. 

Snorri segir það ekki endilega til marks um raunverulegt virði félagins.

„Í raun og veru er félagið mjög verðlítið ef gengið er undir svona einum og hálfum og það er mjög lítil velta sem liggur á bak við þetta, vegna þess að þegar félagið er ekki nema nokkur hundruð milljóna virði, þá er voðalega lítið hægt að lesa út úr því. Þó að sveiflan sé mikil í prósentum talið þá er hún lítil í verðmæti félagsins í raun og veru.“

Standa vel

Loks segist hann ekki hafa áhyggjur af framtíð Play.

„Þeir hafa tryggt sér fjármögnun upp á tuttugu milljónir dollara, eða um 2,4 milljarða íslenskra. Svo ég held að þeir standi vel fjárhagslega. En reksturinn er þungur eins og þessi afkomuviðvörun gaf til kynna.“