Tekjur Nova í hæstu hæðum

Hagnaður samstæðunnar eftir skatta nam 282 milljónum króna.

Þetta kemur fram í ársfjórðungsuppgjöri Nova klúbbsins hf. 

Reksturinn styrktist bæði í tekjum og arðsemi. Þjónustutekjur jukust um 5,3 prósent og tekjur af FastNeti um 10,5 prósent milli ára, meðal annars vegna fjölgunar heimilistenginga um 5,6 prósent og vaxtar í sérlausnum fyrir stórnotendur á gagnamagni. 

Í tilkynningu segir að einföldun í rekstri hafi skilað sér í bættri arðsemi og EBITDA-hlutfall Nova hafi hækkað í 26,9 prósent úr 20,4 á fyrri ársfjórðungi. Nova skilaði 567 milljónum króna í handbæru fé frá rekstri á fjórðungnum.

Hjá Ofar höfðu aukin birgðakaup fyrir boðaðar verðhækkanir og fyrirsjáanlegt skert framboð á tölvubúnaði tímabundin áhrif á fjárbindingu félagsins, að því er fram kemur í tilkynningunni. Sú ákvörðun hafi gefið forskot við öflun nýrra viðskiptavina. Þetta hafi haft áhrif á handbært fé frá rekstri samstæðunnar, sem hafi verið neikvætt um 47 milljónir króna.

Félagið hafi nýtt sér skammtímafjármögnun sem hafi nú að stórum hluta verið greidd niður. Áfram verði lögð áhersla á að draga úr fjárbindingu í birgðum, styrkja sjóðstreymið og vinna að samlegðarverkefnum.