Óku á yfir 60 og missa ökuréttindin

Við Kringlumýrarbraut standa yfir framkvæmdir við nýja akrein. Hámarkshraði á veginum er alla jafna sextíu kílómetrar á klukkustund en meðan á framkvæmdunum stendur hefur hann verið dreginn niður í þrjátíu kílómetra á klukkustund.

Í dagbók lögreglunnar á höfuðborgarsvæðinu frá því í gær segir að fimm hafi verið sviptir ökuréttindunum fyrir að aka of hratt á vinnusvæði þar sem hámarkshraði er þrjátíu kílómetrar á klukkustund. Þá voru tveir sektaðir fyrir of hraðan akstur.  

Árni Friðleifsson aðstoðaryfirlögregluþjónn í umferðardeild lögreglunnar ræddi sviptingarnar í Bítinu. 

„Það er mjög algengt hjá vegaframkvæmdum að hraði sé tekinn niður í þrjátíu kílómetra hámarkshraða. Einhverra hluta vegna eru ökumenn á sextíu, sjötíu kílómetra hraða fram hjá þessum vegavinnuköflum. Það voru gerðar radarmælingar þar sem þetta var niðurstaðan. Menn eiga von á ökuleyfissviptingum, þeir sem fóru yfir tvöfaldan hámarkshraða.“

Hann vekur athygli á átaki Vegagerðarinnar og Ríkislögreglustjóra fyrir tveimur árum: „Mamma og pabbi vinna hérna,“ sem hafi þó borið takmarkaðan árangur. 

„Þetta er mikið vandamál hérna á Íslandi. Það liggur við að þeir einu sem keyra á löglegum hraða á framkvæmdasvæðum eru útlendingar. Þeir þekkja þetta frá útlöndum, ef það er þrjátíu kílómetra hámarkshraði þá ferðu ekkert hraðar.“