Hin stór­stjarna Celtics þurfti einnig að fara undir hnífinn

Eftir að missa Jayson Tatum í skelfileg meiðsli í miðri úrslitakeppni hefur NBA-lið Boston Celtics greint frá því að hin stórstjarna félagsins – Jaylen Brown – hafi einnig þurft að fara undir hnífinn.

Tatum sleit hásin í miðri úrslitkeppni og náðu ríkjandi meistarar aldrei vopnum sínum eftir það. Þá kláraði Brown tímabilið með rifu í liðmána og var á verkjalyfjum síðustu vikurnar áður en Celtics féll úr leik.

Var það vegna meiðslanna sem hinn 28 ára gamli Brown þurfti að gangast undir litla aðgerð til að hreinsa til í hægra hné leikmannsins. Celtics hefur gefið út að hann verði klár þegar æfingabúðir hefjist fyrir næsta tímabil.

Brown skoraði að meðaltali 22,2 stig, tók 5,8 fráköst og gaf 4,5 stoðsendingar í leik á liðinni leiktíð. Reiknað er með að ábyrgð hans verði enn meiri á næstu leiktíð þar sem Tatum verður líklega frá keppni allt tímabilið.