Ó­vissa um verk­föll eftir frestunarbeiðni

Ríkissáttasemjari lagði fram innanhússtillögu í deilu kennara við sveitarstjórnir og ríkið í dag. Kennarar samþykktu tillöguna en sáttasemjari gaf hinu opinbera frest til klukkan tíu í kvöld til að opinbera afstöðu sína.

Ekki liggur fyrir hvort að samþykki kennara feli það í sér að verkfallsaðgerðum sem hefjast samkvæmt áætlun á morgun verði frestað en aflýsing verkfalla er háð því að samningar náist.

Afstaða kennaranna liggur enn ekki fyrir að sögn Ástráðs Haraldssonar ríkissáttasemjara. Hann segist þó líta svo á að verkföllin skelli á í fyrramálið

Samninganefnd Sambands íslenskra sveitarfélaga hittist á fundi klukkan átta í kvöld.

Þrátt fyrir ítrekaðar tilraunir hefur ekki náðst í stjórnendur Kennarasambandsins eða fulltrúa samninganefndar ríkisins. Upplýsingafulltrúa KÍ hafa ekki borist neinar upplýsingar en skólameistari Borgarholtsskóla segist ganga út frá því að kennarar þar leggi niður störf á miðnætti.

„Ef að ekkert heyrist þá er í raun og veru verkfall hafið,“ segir Ársæll Guðmundsson, skólameistari Borgarholtsskóla. Það eina sem gæti afstýrt verkföllum væri það að samningsaðilar nái saman.