Í­trekar að honum er al­vara um Kanada

Í viðtali sem sýnt var á Fox News í gær hélt Trump því fram að Kanada græddi tvö hundruð milljarða dala af Bandaríkjunum á ári og hann myndi ekki láta það viðgangast lengur.

„Af hverju erum við að borga 200 milljarða dala á ári, í rauninni að niðurgreiða Kanada?“ spurði Trump í viðtalinu.

Eins og bent er á í frétt AP fréttaveitunnar er það ekki rétt að Bandaríkin „niðurgreiði“ Kanada. Viðskiptahalli ríkjanna hefur aukist töluvert á undanförnum árum og var árið 2023 kominn í 72 milljarða dala.

Þessi aukning er þó að mestu til komin vegna aukinna kaupa Bandaríkjamanna á hráolíu frá Kanada. Olíu sem unnin er í Bandaríkjunum.

Trump hélt því einnig fram fyrr í gærkvöldi að Kanda gæti ekki verið til án viðskipta við Bandaríkin og varaði við því að Kanadamenn, sem komu að stofnun Atlantshafsbandalagsins með Bandaríkjunum, gætu ekki lengur treyst á Bandaríkin í varnarmálum.

„Þú veist, þeir borga ekki mikið fyrir her. Ástæðan fyrir því að þeir borga ekki mikið, er að þeir gera ráð fyrir að við munum verja þá. Þeir geta ekki gengið að því vísu. Af hverju erum við að verja annað ríki?“ spurði Trump.

Hann hélt því svo fram að hann elskaði Kanadamenn og að samband hans við þá væri frábært.

„En, ef þeir yrðu 51. ríkið væri það það allra besta sem þeir gætu gert,“ sagði Trump.

Segir Trump sækjast eftir auðlindum

Justin Trudeau, forsætisráðherra Kanada, sagði á fundi með leiðtogum úr viðskipta- og verkalýðssamfélögum Kanada, að hann teldi Trump vera alvara þegar hann talaði um að Kanada gengi inn í Bandaríkin.

Forsætisráðherrann heyrðist segja að hann teldi Trump vilja aðgang að náttúruauðlindum Kanada og að Trump teldi auðveldustu leiðina til þess vera að Kanada yrði hluti af Bandaríkjunum.

„Þeir eru mjög meðvitaðir um auðlindir okkar og þeir eru áfjáðir í að geta hagnast á þeim,“ heyrðist Trudeau segja.

Kannanir í Kanada hafa sýnt að íbúum þar er verulega illa við hugmyndir Trumps um að ríkið gangi inn í Bandaríkin. Kanadíski miðillinn Global News sagði frá því á dögunum að yfirgnæfandi meirihluti Kanadamanna væri reiður yfir ítrekuðum ummælum Trumps.

Í nýrri könnun hefðu 68 prósent svarenda sagst sjá Bandaríkin í neikvæðara ljósi en áður en haft er eftir einum þeirra sem stóðu fyrir könnuninni að fólki hafi verið mjög heitt í hamsi. Reiðin var hvað mest meðal þeirra sem voru eldri en 55 ára.

Tveir þriðju svarenda sögðust ætla að forðast það að setja vörur frá Bandaríkjunum í innkaupakerrur sínar í framtíðinni og sambærilegur fjöldi sagðist ekki ætla að ferðast til Bandaríkjanna.

Leitar vina og markaða í Evrópu

Trump sagði einnig í gær að hann væri ekki sannfærður um að ráðamenn í Kanada og í Mexíkó væru að gera nóg til að koma í veg fyrir umfangsmikla tolla sem hann frestaði um þrjátíu daga fyrr í þessum mánuði.

Slíkir tollar á vörur frá Kanada, eins og áðurnefnda hráolíu og íhluti í bíla, gætu valdið miklu tjóni á hagkerfi Kanada. Það er mjög samofið hagkerfi Bandaríkjanna.

Trudeau er nú á ferð um Evrópu en samkvæmt Ríkisútvarpi Kanada (CBC) er hann þar til að styrkja tengsl við ríki Evrópu á sviði viðskipta og varnarmála.

Haft er eftir fyrrverandi ráðgjafa forsætisráðherrans að hann muni að öllum líkindum ræða við ráðamenn í Evrópu um hvernig bregðast eigi við orðum og gjörðum Trumps og óvissunni sem fylgir honum.

Trump hefur einnig hótað Evrópusambandinu umfangsmiklum tollum. Kanada og ESB hafa gert fríverslunarsamning sín á milli, sem skrifað var undir þann 2016 en samkvæmt frétt CBC hefur ávinningur af þeim samningi verið minni en vonast var til.

Tíu aðildarríki ESB hafa ekki skrifað undir samninginn en búist er við því að Trudeau muni reyna að sannfæra ráðamenn þeirra um að skrifa loks undir hann og meðal annars nota hótanir Trumps til að ná því fram.