Flugvélin fundin

Þetta kemur fram í tilkynningu frá Landsbjörg en það var áhöfn flugvélar Icelandair á leið til Egilsstaða sem kom auga á flugvélina. Áhöfn ferðaþjónustuþyrlu frá Möðrudal sem tók þátt í aðgerðum staðfesti svo fundinn og staðsetningu. Að lokum kom þyrla Landhelgisgæslunnar á staðinn skömmu síðar ásamt björgunarfólki. Öðrum viðbragðsaðilum var í kjölfarið snúið við.

Komin að vélinni

Í samtali við fréttastofu segist Jón Þór Víglundsson, upplýsingafulltrúi Slysavarnafélagsins Landsbjargar, ekki hafa upplýsingar um líðan fólksins um borð að svo stöddu. Viðbragðsaðilar hafi nú komist að vélinni. 

Boð barst frá neyðarsendi um borð í fjögurra sæta Cessna 172 flugvél nálægt Breiðdalsheiði um klukkan sex í kvöld. Ekki náðist samband við vélina og var þyrla Landhelgisgæslunnar kölluð út ásamt öllum björgunarsveitum á Austurlandi. 

Náði leitarsvæðið frá Öxi og í vesturátt og byggði á neyðarboðinu og vitnisburði sjónarvotta sem töldu sig hafa séð til vélarinnar. Lögreglan á Austurlandi tók einnig þátt í aðgerðum og var þeim stýrt af Landhelgisgæslunni úr Samhæfingarmiðstöðinni í Skógarhlíð í Reykjavík. 

Fréttin hefur verið uppfærð.