Grái kötturinn fær ekki krónu frá borginni

Málið snerist um það að eigendur veitingastaðarins töldu sig eiga rétt á skaðabótum vegna tjóns sem þeir urðu fyrir af völdum tafa við framkvæmdir á Hverfisgötu árið 2019, þar sem Grái kötturinn er staðsettur.

Mikillar óánægju gætti á meðal rekstraraðila á Hverfisgötu vegna tafa á framkvæmdum á vegum borgarinnar og Orkuveitu Reykjavíkur. Lítið upplýsingaflæði og skortur á aðgengi að verslunum og veitingahúsum við götuna vegna framkvæmdanna var gagnrýndur.

Framkvæmdirnar á Hverfisgötu voru afar umdeildar. Þær hófust í maí og átti að vera lokið um þremur mánuðum síðar, í ágúst í kringum menningarnótt. Verklok tókust hins vegar ekki fyrr en í nóvember sama ár.

Vildu 18,5 milljónir

Fór það svo að Ásmundur og Elín Ragnarsdóttir, eigendur Gráa kattarins, stefndu borginni og kröfðust þau 18,5 milljóna í skaðabætur. Aðalmeðferð fór fram í málinu í október líkt og Vísir fjallaði um en þar sagði Ásmundur að það væri gott og blessað að framkvæmdaraðilar hefðu sýnt vilja til að læra af því hvað fór úrskeiðis.

„Það sem er grátlegt við þetta er að það eru allir búnir að viðurkenna mistök; Veitur, borgin, meira segja Dagur borgarstjóri – allir tilbúnir til að læra á minn kostnað,“ sagði Ásmundur sem bætti síðar við:

„Gangi þeim vel að læra af þessu en ég vil fá borgað.“

Dómur í málinu var kveðinn upp í dag og segir það að þrátt fyrir að ljóst sé að verkið hafi tafist verði ekki sé að þá töf sé hægt að rekja til saknæmrar og ólögmætrar háttsemi Reykjavíkurborgar.

„Verkið tafðist m.a. vegna nauðsynlegra breytinga og aukinnar vinnu sökum verkefna sem voru á forræði Veitna ohf. og vegna atriða í tengslum við gamla símstrengi sem voru áábyrgð Mílu ehf., sem ekki er á ábyrgð stefnda að því er séð verður. Auk þess varð töf á afhendingu lagnaefnis í hitaveituna, segir í dómi héraðsdóms.“

Var borgin því sýknuð af kröfu Gráa kattarins um skaðabætur.

„Litli maðurinn tapar alltaf. Grái kötturinn fór í mál við Reykjavíkurborg en tapaði. Dómur var kveðinn upp í dag,“ skrifar Ásmundur Helgason á Facebook vegna málsins þar sem með fylgir fýlukall og hreyfimynd af sorgmæddum ketti.