Enginn Martin, Elvar eða Haukur Helgi í íslenska landsliðinu í körfubolta

Íslenska körfuboltalandsliðið verður aðeins með einn atvinnumann innanborðs þegar liðið hefur leik í í forkeppni að undankeppni HM 2023 núna í febrúar.

Martin Hermannsson, besti leikmaður íslenska landsliðsins, hefur ekki kost á sér í þetta verkefni út af álagi vegna leikja með Alba Berlín í EuroLeague. Martin þarf einnig aðhlynningu vegna meiðsla.

Hann er ekki eini atvinnumaðurinn sem verður ekki með. Haukur Helgi Briem Pálsson er að ná sér eftir meiðsli og gefur ekki kost á sér og Elvar Már Friðriksson er meiddur.

Eini atvinnumaðurinn í íslenska liðinu er miðherjinn Tryggvi Snær Hlinason sem spilar með Basket Zaragoza á Spáni.

Íslenska liðið leikur í einum af tveimur fjögurra liða riðlum forkeppninnar og er í riðli með Slóvakíu, Kosovó og Lúxemborg. Efstu tvö liðin í lok þriðja gluggans í febrúar 2021 þegar liðin hafa leikið heima og að heiman fara áfram í aðra umferð.

Fyrsti leikur liðsins verður á útivelli gegn Kosovó þann 20. febrúar í Pristhina og verður hann í beinni útsendingu á RÚV2 kl. 18:00 að íslenskum tíma. Íslenska liðið mun ferðst út mánudaginn 17. febrúar og vera þar við æfingar fram að fyrsta leik. Síðari leikurinn í þessum glugga verður svo heima í Laugardalshöllinni kl. 20:00 sunnudaginn 23. febrúar gegn Slóvakíu og verður hann einnig í beinni á RÚV2.

Craig Pedersen var endurráðinn þjálfari liðsins á dögunum og Baldur Þór Ragnarsson er aðstoðarþjálfari hans líkt og áður og sér um styrktarþjálfun liðsins að auki.

Ein breyting hefur orðið á aðstoðarþjálfarateyminu en Finnur Freyr Stefánsson verður ekki með liðinu áfram en hann er við störf sem aðalþjálfari Horsens í Danmörku. Í hans stað hefur Hjalti Þór Vilhjálmsson, þjáflari karlaliðs Keflavíkur, verið ráðinn sem einn af aðstoðarþjálfurum landsliðsins en hann hefur þjálfað áður yngri landslið Íslands á ýmsum aldursstigum.

Leikmannahópurinn í þessum glugga verður þannig skipaður:

Breki Gylfason · Haukar · 6 landsleikir

Gunnar Ólafsson · Stjarnan · 18

Hjálmar Stefánsson · Haukar · 15

Hörður Axel Vilhjálmsson · Keflavík · 82

Kári Jónsson · Haukar · 10

Kristinn Pálsson · Njarðvík · 13

Pavel Ermolinskij · Valur · 73

Pétur Rúnar Birgisson · Tindastóll · 9

S. Arnar Björnsson · Grindavík · 8

Tómas Þórður Hilmarsson · Stjarnan · 4

Tryggvi Snær Hlinason · Basket Zaragoza · 37

Ægir Þór Steinarsson · Stjarnan · 61

Leikmenn sem voru valdir en eru ekki tiltækir að þessu sinni:

Elvar Már Friðriksson - Meiddur

Haukur Helgi Briem Pálsson - Er að ná sér eftir meiðsli, gefur ekki kost á sér

Kristófer Acox - Er að ná sér eftir meiðsli, gefur ekki kost á sér

Martin Hermannsson - Leikir í EuroLeague auk þarf í aðhlynningu v/ meiðsla einnig

Með liðinu auk þjálfaranna þriggja ferðast í teyminu Halldór Fannar Júlíusson sjúkraþjálfari, Kristinn Geir Pálsson, fararstjóri og Hannes S. Jónsson, formaður KKÍ.