„Hellings tæki­færi fyrir unga menn úti á landi“

Stefán Árni Pálsson benti í þessu sambandi á Adam Eið Ásgeirsson sem fór frá Njarðvík til Hattar á sínum tíma og hefur sprungið þar út.

„Það eru hellings tækifæri fyrir unga menn að fara í lið úti á landi, fá að spila og þróast,“ sagði Jón Halldór Eðvaldsson og Sævar Sævarsson tók undir það:

„Ég hafði tækifæri á þessu þegar ég var svona 21-22 ára en maður vildi frekar halda sig á „hótel mömmu“ og í kringum félagana. En þetta er svo ótrúlega þroskandi. Að búa sjálfur, vera einhvers staðar að vinna og kynnast nýju fólki og samfélagi,“ sagði Sævar og Jonni var sammála:

„Ég fór 17 ára til að spila fótbolta með Þrótti Neskaupstað og ég bý enn að þeirri reynslu.“

Talið barst einnig að erlendum leikmönnum Hattar sem í raun eru orðnir að heimamönnum í dag, eins og hinn 38 ára gamli Nemanja Knezevic sem spilað hefur á Íslandi síðan árið 2017.

„Þetta er mikið meira en leikmaður á körfuboltavelli. Þetta eru menn sem eru svo mikilvægir í samfélaginu. Þeir eru ekki að koma sem einhverjir málaliðar, ná sér í einhverja tölfræði og fara svo. Þeir búa þarna, vinna þarna og eru bara Egilsstaðabúar út í gegn. Maður sér líka hvað þetta skiptir þá miklu máli,“ sagði Sævar en umræðuna má sjá hér að ofan.