Erlent

Umfangsmiklar árásir í Ísrael og á Gasa

Samúel Karl Ólason skrifar
Umfang árása beggja vegna yfir landamærin hefur ekki verið svo mikið í nokkurn tíma.
Umfang árása beggja vegna yfir landamærin hefur ekki verið svo mikið í nokkurn tíma. AP/Adel Hana
Hernaðaryfirvöld Ísrael segjast hafa gert loftárárásir á um hundrað skotmörk á Gasa-ströndinni í nótt. Það var gert eftir að Hamas-liðar skutu um 370 flugskeytum að Ísrael í gær. Flugskeytaárásirnar hafa haldið áfram í dag. Sex Palestínumenn hafa fallið, þar af tveir borgarar, og einn maður er dáinn í Ísrael og um tuttugu manns hafa særst.

Útlit er fyrir að átökin muni harðna og hafa báðar fylkingar heitið því að gefa ekkert eftir. Forsvarsmenn hers Ísrael hafa skoðað að kalla út varalið hersins en sú ákvörðun var tekin í morgun að fresta því um tíma.

Samkvæmt Times of Israel segir ísraelski herinn (IDF) að rúmlega 400 sprengjum hafi verið varpað á Ísrael frá því á sunnudaginn og að Hamas-liðar sitji á allt að 20 þúsund slíkum sprengjum. Af 400 sprengjum hafa um hundrað verið skotnar niður af loftvarnarkerfi Ísrael. Kerfið er ekki hannað til að meðhöndla svo tíðar árásir.



Árásir Hamas-liða hófust eftir að sérsveitarmenn IDF gerðu árás á Gasa og felldu þar nokkra meðlimi Hamas og einn leiðtoga þegar upp komst um þá. Einn sérsveitarmaður dó í árásinni.

Eins og áður segir er einn látinn í Ísrael. Hann lést þegar sprengja lenti á húsi hans í Ashkelon og særðust tveir alvarlega. Herinn birti nú fyrir skömmu myndband af vettvangi sprengjuárásarinnar þegar björgunarmenn voru að störfum.

Umfang árása beggja vegna yfir landamærin hefur ekki verið svo mikið í nokkurn tíma. Guardian hefur eftir íbúum á Gasa að herinn varpi smáum sprengjum á þök íbúðarhúsa til að gera fólki ljóst að stærri árás sé í vændum. Íbúar hafi þá nokkrar mínútur til að koma sér út áður. Það útskýri hve fáir borgarar á Gasa hafi í raun fallið þrátt fyrir umfang árásanna og það að minnst þremur fjölbýlishúsum hafi verið rústað.



Undanfarin misseri hafa sífellt hærri raddir innan ísraelska stjórnmála heyrst kalla eftir harðari aðgerðum gagnvart Hamas á Gasa. Meðal annarra kallaði Avigdor Liberman, varnarmálaráðherra, eftir innrás á Gasa svo hægt væri að reka Hamas-liða á brott þaðan.

Sjá einnig: Varnarmálaráðherra Ísrael vill gera innrás á Gasa



Umfangsmikil mótmæli, óeirðir og ofbeldi við landamæri Ísrael og Gasa hafa staðið yfir frá því í mars og hafa fjölmargir Palestínumenn látið lífið. Óeirðirnar hafa að mestu leyti falið í sér íkveikjur í dekkjum og grjótkasti. Hins vegar hefur komið til skot- og sprengjuárása og á tímabilinu hafa fjölmörg íkveikjutæki verið send svífandi yfir landamærin. Þau tæki hafa valdið kjarreldum og brennt ræktunarland í Ísrael.

Liberman sagði í október að innrás á Gasa myndi tryggja frið á svæðinu í fjögur til fimm ár.

„Við þurfum að veita Hamas alvarlegt högg. Það er eina leiðin til að tryggja ró á nýjan leik,“ sagði Liberman. „Þegar Hamas segir að óeirðirnar muni halda áfram þar til herkvíin verði felld niður, verðum við að móttaka það. Að binda enda á herkvína þýðir aðeins eitt. Að hleypa Hezbollah og Íran inn á Gasa,“ sagði Liberman.

Hér má sjá myndband sem her Ísrael birti af árásunum í gær. Þar að neðan má sjá myndband af loftvörnum Ísrael í morgun og loftárás á Gasa.

Íran Ísrael Mið-Austurlönd Palestína

Mest lesið


Fleiri fréttir

Sjá meira


×

Mest lesið