Matteo Renzi segir af sér

Stjórnarkreppa er yfirvofandi á Ítalíu en þingkosningarnar sem fram fóru í landinu í gær skiluðu engum augljósum niðurstöðum. Þá hefur Matteo Renzi, fyrrverandi forsætisráðherra og leiðtogi ítalska demókrataflokksins, sagt af sér formennsku vegna lakrar frammistöðu flokksins í kosningunum. Erfiðar stjórnarmyndunarviðræður eru framundan sem gætu tekið einhverjar vikur.

Svo virðast sem hægri- og þjóðernisflokkar hafi notið mestrar hylli í þingkosningunum í gær og hafa leiðtogar róttækra flokka lýst yfir áhuga á að mynda stjórn. Hægriflokkabandalag fyrrverandi forsætisráðherrans Silvio Berlusconi hlýtur flest þingsæti að öllum líkindum en Fimmstjörnuhreyfingin svokallaða, er hins vegar stærsti einstaki flokkurinn að loknum kosningunum með rúmlega 30% atkvæða.

„Kosningarnar eru sigur fyrir Fimmstjörnuhreyfinguna. Við erum sigurvegarar kosninganna,“ segir Luigi Di Maio, leiðtogi hreyfingarinnar. Í svipaðan streng tekur leiðtogi hægriflokksins Lega, en báðir hafa flokkarnir lýst yfir nokkurri andstöðu við Evrópusambandið.

„Þetta er ótrúlegur sigur sem fyllir okkur stolti, gleði og kallar á ábyrgð því milljónir Ítala hafa beðið okkur að taka völdin á ný í þessu landi,“ segir Matteo Salvini, leiðtogi Lega, sem mátti góðu gengi fagna í kosningunum. Ef illa gengur að mynda stjórn er ekki útilokað að blása þurfi til nýrra kosninga en ekki þykir líklegt að nýjar kosningar skili endilega skýrari niðurstöðum.