Haukur Ingi að koma til

Knattspyrnumaðurinn Haukur Ingi Guðnason lék á föstudaginn með U23 liði Fylkis sem tapaði 5-0 fyrir U23 liði Þróttar. Þetta er fyrsti leikur Hauks síðan hann sleit krossbönd í hné í mars í fyrra. Hann gekkst þá undir aðgerð og lék ekkert með Fylki í Landsbankadeildinni síðasta sumar. Læknirinn sem framkvæmdi aðgerðina gerði slæm mistök og setti krossbandið á rangan stað sem gerði það að verkum að Haukur var lengur frá og var ekki búist við því að hann gæti leikið eitthvað í sumar.Hauki gekk ágætlega í leiknum að eigin sögn. "Maður fór rólega í þetta, það hefði kannski verið skemmtilegra að snúa aftur í einhverjum öðrum leik þar sem Þróttarar rúlluðu okkur upp þarna. Annars var þetta bara mjög skemmtilegt. Ég tek enga áhættu annars og er ekki að flýta mér að neinu." sagði Haukur Ingi sem gerir sér vonir um að geta leikið einhverjar mínútur með Fylki í Landsbankadeildinni undir lok móts. Haukur segist vera tæpu hálfu ári á undan upphaflegri áætlun, það eru nokkrir samverkandi þættir sem orsaka það. "Síðasta aðgerð heppnaðist mjög vel, það voru miklir fagmenn sem skáru mig upp og ég er búinn að vera í stífri sjúkraþjálfun. Þá hef ég verið mjög duglegur að æfa sjálfur, ég æfði marga tíma á dag síðasta vetur og það er að skila sér. Þetta lítur ágætlega út." sagði Haukur Ingi sem hefur gengið í gegnum erfiða tíma vegna meiðsla."Ég hef reynt eins og ég get að líta á jákvæðu hliðarnar þó það hljómi furðulega. Svo hefur maður verið í námi með og það hefur hjálpað mér að dreifa huganum. Stefnan er sett á að verða í betra líkamlegu standi næsta tímabil heldur en ég var í fyrir meiðslin." sagði Haukur Ingi.