Hormússund sagt lokað á ný

Forsætisráðherra Ísrael gaf í kjölfarið út að vopnahléið næði ekki til átaka Ísraelshers við Hezbollah í Líbanon. Stjórnvöld í Ísrael ítrekuðu í dag að þau ætli ekki að hætta árásum í Líbanon og Bandaríkjastjórn staðfestir að umrætt samkomulag um vopnahlé nái ekki til átaka þar. Ísraelsher gerði umfangsmiklar árásir á höfuðborg Líbanon í gær og eru minnst 112 sögð hafa fallið.

AP-fréttaveitan greinir frá lokuninni og breska ríkisútvarpið BBC segir að nálægum skipum hafi verið tilkynnt í dag að Hormússund væri lokað og óheimilt væri að sigla þar í gegn án leyfis frá Íranska byltingarverðinum. 

„Öll skip sem reyna að sigla út á haf verða skotmörk og þeim sökkt,” sagði í tilkynningunni. Hormússund er hluti af einni mikilvægustu siglingaleið heims og hefur lokun þess haft mikil áhrif á olíuverð og alþjóðahagkerfið.

Vara við alvarlegum afleiðingum

Ríkismiðill í Íran segir að Íranski byltingarvörðurinn vari nú við afleiðingum þess að árásir á Líbanon haldi áfram. Hann boði viðbrögð sem „muni valda eftirsjá“ ef árásum verði ekki hætt tafarlaust. Á samskiptamiðlinum Telegram segir ríkismiðillinn að Bandaríkjunum og stjórnvöldum í Ísrael sé hér með send ströng viðvörun. 

Ísraelsher gerði í gær árásir á nokkur verslunar- og íbúðahverfi í miðborg Beirút, höfuðborgar Líbanon, nokkrum klukkustundum eftir að tilkynnt var um áðurnefnt vopnahlé. Yfirvöld í Líbanon segja að minnst 112 manns hafi fallið og hundruð særst sem gerir þetta einn mannskæðasta daginn í stríði Ísraels og Hezbollah til þessa.

Ríkisfréttastofan Islamic Republic News Agency hefur eftir embættismanni innan Íranska byltingarvarðarins: „Sérhver árás á hið stolta Hezbollah er árás á Íran. [Herinn] undirbýr hörð viðbrögð við villimannslegum glæpum stjórnarinnar í [Ísrael],“ að því er fram kemur í frétt BBC.

Utanríkisráðherra Írans með skilaboð til Bandaríkjanna

Abbas Araghchi utanríkisráðherra Íran sagði í skilaboðum til Bandaríkjanna að stríði Ísraels gegn Hezbollah í Líbanon yrði að ljúka og þetta þyrfti að vera hluti af vopnahléssamkomulaginu. 

„Heimurinn sér fjöldamorðin í Líbanon,“ sagði hann í færslu á X, áður Twitter. „Boltinn er hjá Bandaríkjunum og heimurinn fylgist með því hvort þau standi við skuldbindingar sínar.“

Bandaríkjastjórn staðfestir að Líbanon sé ekki hluti af samkomulaginu

Karoline Leavitt, fjölmiðlafulltrúi Hvíta hússins, sagði við blaðamenn nú síðdegis að Líbanon væri ekki hluti af vopnahléssamkomulaginu. Aðspurð hvort Líbanon gæti orðið hluti af samkomulaginu sagði hún að það yrði áfram til umræðu. Hún fullyrðir að Trump vilji að Hormússund opni á ný „án nokkurra takmarkana.“

Leavitt var spurð út í fréttir íranska ríkisfjölmiðilsins um að Hormússundið væri lokað, þrátt fyrir að opnun þess hafi verið sett sem skilyrði fyrir tímabundnu vopnahléi.

Leavitt svaraði að Trump hafi verið upplýstur um fréttirnar sem hún lýsir sem „óásættanlegum“. Hún bætti við að það sem sagt hafi verið opinberlega sé ólíkt því sem hafi komið fram á einkafundum.

Leavitt ítrekar Bandaríkjaforseti eigi von á því að sundið verði opnað „tafarlaust“ og fullyrðir að honum hafi verið tjáð að fréttir sem gefi annað í skyn séu rangar.

Leavitt bætti við að Bandaríkjaforseti væri að senda samningateymi sitt til Islamabad í Pakistan en stjórnvöld þar hafa átt milligöngu um viðræður Bandaríkjanna og Íran. Teymið samanstandi af JD Vance varaforseta, Steve Witkoff, ráðgjafa Trumps, og Jared Kushner, tengdasyni forsetans. Samtöl muni hefjast á laugardagsmorgun að staðartíma. 

Netanjahú ætlar ekki að hætta árásum í Líbanon

Benjamín Netanjahú, forsætisráðherra Ísraels, ítrekaði í kvöld að vopnahléið næði ekki til árása á Hezbollah í Líbanon. Hann gaf í skyn í nýrri yfirlýsingu að Ísrael sé reiðubúið að hefja átök við Íran að nýju ef „þörf krefur“ og segir að „fingur okkar“ sé enn á gikknum. 

Áfram verði gerðar harðar árásir í Líbanon. Þá bætti hann við að vopnahléssamkomulagið sem tilkynnt hafi verið í gær hafi verið gert í samráði við Ísrael og neitar því að þeim hafi verið tilkynnt um það á síðustu stundu.

Fréttin hefur verið uppfærð.