Vinna á­fram að alþjóðahöfn og iðnaðar­svæði í Finnafirði

Í kvöldfréttum Sýnar var rifjað upp að aldarfjórðungur er frá því stórskipahöfn í Gunnólfsvík fór fyrst inn á aðalskipulag.

Fyrir tólf árum var ritað undir samstarfsyfirlýsingu í Ráðherrabústaðnum við Bremenports um að hefja rannsóknir vegna hafnargerðar.

Fyrir sjö árum var á hafnarbakkanum á Þórshöfn ritað undir samning um stofnun þróunarfélags Finnafjarðarhafnar.

Lítið hefur gerst síðan. Fyrir þremur árum sagði fulltrúi Bremenports Finnafjörð fastan í þagnarmúr þáverandi ríkisstjórnar.

Í síðustu viku buðu Langanesbyggð og Vopnafjarðarhreppur til sameiginlegs íbúafundar á Þórshöfn með fulltrúum Bremenports um stöðu málsins. Verkefnið er enn lifandi, eins og heyra má hér í frétt Sýnar:

Upphaflegar hugmyndir um risahöfn vegna siglinga um Íshafið eða olíuhöfn eru þó ekki lengur í umræðunni. Núna er viðskiptahugmyndin sú að byrja á vindorkuveri. Höfnin kæmi svo í áföngum í framhaldinu.

Umhverfismat er í gangi fyrir tvær vindmyllur á Sauðaneshálsi sem þýska fyrirtækið WPD hyggst reisa í tilraunaskyni til að undirbúa allt að 500 megavatta raforkuver. Orkan yrði nýtt til framleiðslu vistvæns rafeldsneytis fyrir skip. Hliðarverkefni yrði fiskeldisstöð á landi.

Forstjóri Bremenports, Robert Howe, og Lars Stemmler, yfirmaður alþjóðamála fyrirtækisins, nýttu Íslandsheimsóknina einnig til fundar í forsætisráðuneytinu með verkefnastjóra stórfjárfestinga, Karli Guðmundssyni. Einnig sat fundinn sérfræðingur á skrifstofu samhæfingar í ráðuneytinu.

„Á fundinum voru stjórnvöld upplýst um stöðu málsins og sagt var frá íbúafundi í Langanesbyggð. Á fundinum kom fram að stjórnvöld munu áfram eiga samtöl um málið við sveitarfélög og þróunaraðila um þá þætti sem snúa að stjórnvöldum,“ segir Sighvatur Arnmundsson, upplýsingafulltrúi forsætisráðuneytis, spurður um fundinn í ráðuneytinu.

Fulltrúar Bremenports telja Finnafjarðarverkefnið ríma vel við áherslur stjórnvalda.

„Við teljum að með verkefni okkar getum við stutt við framtíðarstefnu Íslands á sviði atvinnumála,“ segir Lars Stemmler.

Hann segir aðstæður á norðausturhorni landsins henta vel fyrir slíka atvinnuuppbyggingu.

„Þar á staðnum er mesta vindorka sem Ísland getur boðið upp á ásamt hagstæðu landslagi í kringum Finnafjörð.“

Þegar kemur að tímaramma verkefnisins minnir Lars á að hafnirnar í Bremen og Bremerhaven hafi byggst upp á yfir tvöhundruð árum.

„Það er tímarammi sem við getum hugsað okkur. Fyrir Finnafjörð kannski tíu eða fimmtán ár.“

„Fyrst þurfum við að tryggja raforkuframboð þar og í næstu skrefum þurfum við að fara yfir í nýtingu og framkvæmd,“ segir Lars Stemmler.

Hér má rifja upp fimmtán ára gamla frétt Stöðvar 2 um áform sveitarstjórnarmanna norðaustanlands: