Vélfag hafi í­trekað grafið undan eigin undan­þágu

Arion banki frysti fjármuni Vélfags í júlí á grundvelli alþjóðlegra þvingunaraðgerða gegn Rússlandi vegna fjölþáttaógnar þaðan sem Ísland tekur þátt í. 

Ástæðan var ætluð tengsl Vélfags við rússneska félagið Norebo sem er talið tengjast svonefndum skuggaflota Rússa. Vélfag var selt aðeins þremur dögum áður en Norebo var sett á þvingunarlista og hafa grunsemdir verið uppi um að það hafi verið málamyndagjörningur.

Utanríkisráðuneytið veitti Vélfagi tímabundna undanþágu frá frystingunni í sumar en hafnaði beiðni félagsins um að framlengja hana í gær. Ekki væri forsvaranlegt að viðhalda undanþágunni vegna ítrekaðra tilrauna Vélfags til þess að grafa undan tilgangi og markmiði hennar.

Sýndu ekki samstarfsvilja

Ráðuneytið segir í tilkynningu sem það birti í gær að þegar undanþágan var veitt í sumar hafi verið sett skilyrði um eldvegg á milli félagsins og aðila á þvingunarlista. Undanþágan hafi verið veitt til að viðhalda starfsemi Vélfags og veita því svigrúm til þess að leita lögmætra leiða til að losna undan frystingu fjármunanna.

Synjun ráðuneytisins byggðist á því að þessi skilyrði voru ekki uppfyllt af hálfu félagsins og forsvarsmanna þess, að því er segir í tilkynningunni. Því hafi þannig ekki borist neinar upplýsingar um að Vélfag hafi skilað Arion banka frekari gögnum sem staðfesti að salan á Vélfagi hafi verið raunveruleg og sönn.

Ekki liggi heldur fyrir upplýsingar um að að reynt hafi verið að losa um núverandi eignarhald Vélfags eða að staða þess hafi breyst þrátt fyrir að ráðuneytið hafi veitt ítarlegar upplýsingar um markmið, framkvæmd og öryggisráðstöfun tímabundnu undanþágunnar.

„Þessu til viðbótar er það mat ráðuneytisins að Vélfag hafi ekki sýnt samstarfsvilja til að tryggja markmið öryggisráðstöfunar (eldveggs) hinnar tímabundnu undanþágu ráðuneytisins. Þvert á móti hafi ítrekaðar tilraunir verið gerðar sem miði að því að grafa undan tilgangi og virkni hennar,“ segir í tilkynningunni.

Stjórnarformaðurinn „stökk með báða fætur inn í Rússland“

Forsvarsmenn Vélfags hafa þvertekið við að nokkur tengsl séu á milli þess og Norebo lengur, meðal annars í harðorðri yfirlýsingu sem það birti um synjun ráðuneytisins á samfélagsmiðli í gær.

„Engar staðreyndir hafa verið lagðar fram. Ráðuneytið byggir enn á sömu órökstuddu grunsemdum og Arion banki vísaði til í júlí – meintum tengslum við Norebo JSC – tengslum sem hafa ítrekað verið afsönnuð með lögfræðilegum álitsgerðum, samningum og staðfestum gögnum,“ sagði í yfirlýsingu á Facebook.

Alfreð Tulinius, stjórnarformaður Vélfags, er einnig stjórnarformaður og aðalhönnuður skipahönnunarfyrirtækisins Nautic. Það fyrirtæki hóf starfsemi í gegnum dótturfélag í Rússlandi fyrir nokkrum árum. Norebo Group, fyrrverandi eigandi Vélfags, réði Nautic meðal annars til þess að hanna sex togara fyrir sig, að því er sagði í frétt Fiskifrétta árið 2018.

„Það er svolítið ævintýri að hafa stokkið sextugur með báða fætur inn í Rússland og setja alla afkomu af þessu verkefni inn í uppbyggingu þar,“ sagði Alfreð við sjávarútvegsvef mbl.is um fjórum mánuðum áður en Rússar hófu allsherjarinnrás sína í Úkraínu.