Þórunn seld og tuttugu sagt upp

Greint er frá sölunni í tilkynningu á vef Vinnslustöðvarinnar í Vestmannaeyjum (VSV) en þar kemur fram að samningurinn sé undirritaður með fyrirvara um forkaupsrétt Vestmannaeyjabæjar. Skipið verður afhent nýjum eigendum í mars og munu stjórnendur og stjórn Vinnslustöðvarinnar fara yfir næstu skref félagsins í kjölfar sölunnar.

Í tilkynningunni segir að Vinnslustöðin hafi áformað nýsmíði skipa í stað Kap og Drangavíkur, sem bæði eru komin til ára sinna og að félagið áformaði nýbyggingu botnfiskvinnslu sinnar. Kaup á Leo Seafood árið 2023 hafi frestað frekari fjárfestingum í botnfiskvinnslu og kaup á Þórunni Sveinsdóttur tryggt rekstraröryggi botnfiskveiða þar til ný skip væru tekin í notkun. 

„Öllum þessum áformum Vinnslustöðvarinnar hefur ríkisstjórn Kristrúnar Frostadóttur nú kollvarpað,“ segir í tilkynningunni.

Síðan Vinnslustöðin keypti Leo Seafood og Ós hafi stjórnvöld lögfest liðlega tvöföldun veiðigjalda. Í tilfelli Óss hækki veiðigjöld um liðlega 120 milljónir króna og fyrir samstæðu Vinnslustöðvarinnar um 850 milljónir króna þegar þau verði að fullu fram komin.

Sigurgeir segir að sala Þórunnar Sveinsdóttur sé liður í lækkun skulda félagsins og auk þess hafi verið hætt við áform um nýsmíði botnfiskskipa. Áform um lokun Leo Seafood hafi verið kynnt með uppsögn allra starfsmanna félagsins, en nokkrir fengið endurráðningu hjá Vinnslustöðinni.

„Þetta er allt hið sorglegasta mál og þvert á stefnu Vinnslustöðvarinnar, og það sem áður hefur verið sagt. Okkar stefna var að byggja upp traust og öflugt atvinnulíf í Eyjum, samfélaginu sem og þjóðinni allri til hagsbóta. En við förum ekki með lagasetningarvaldið og verðum að hlíta því. Eina sem við getum gert er að bregðast við og það erum við að gera með þessum ráðstöfunum sem bitnar á saklausu fólki, samfélaginu í Eyjum og að lokum á þjóðinni allri,“ segir í tilkynningunni.