Endur­byggja gömul hús úr mið­bæ Reykja­víkur á Sel­fossi

Í húsunum verða 27 íbúðir á efri hæðum og verslunar- og þjónusturými á jarðhæð, auk bílakjallara. Áætluð verklok eru um mitt ár 2027.

„Við erum afar spennt fyrir þessum áfanga enda er hann fyrsta skrefið í frekari uppbyggingu miðbæjarins á Selfossi. Nýi miðbærinn hefur sannað gildi sitt með því að efla mannlíf og menningarstarf í bænum og skapað ný störf. Þetta gefur okkur fullt tilefni til bjartsýni um áframhaldandi uppbyggingu og þau tækifæri sem í henni felast,“ segir Leó Árnason, framkvæmdastjóri Landsbyggðar, í tilkynningu um uppbygginguna.

Þar kemur fram að hugmyndafræðin að baki miðbænum á Selfossi sé að endurreisa horfin hús úr Íslandssögunni og skapa lifandi vettvang fyrir mannlíf og menningu. Þar megi nú finna endurbyggð hús víðs vegar af landinu en í þessum áfanga verði öll húsin ættuð úr miðbæ Reykjavíkur. Húsin voru öll byggð um aldamótin 1900 og mörg þeirra brunnu til kaldra kola í brunanum mikla árið 1915.

„Miðbærinn á Selfossi hefur á örfáum árum orðið hjarta samfélagsins okkar - staður þar sem fólk kemur saman, sækir þjónustu og nýtur lífsins. Áframhaldandi uppbygging er mikið gleðiefni fyrir íbúa, enda mikilvægt skref í þróun sveitarfélagsins og mun styrkja samfélagið til framtíðar,“ segir Bragi Bjarnason, bæjarstjóri Árborgar, í tilkynningunni.

Húsin sem verða endurbyggð við Miðstræti:

● Austurstræti 7

Tvílyft hús sem var reist snemma á 20. öldinni og var í eigu Gunnars Gunnarssonar verslunarmanns. Það brann til kaldra kola í miðbæjarbrunanum mikla árið 1915.

● Austurstræti 9

Þriggja hæða timburhús sem reis við hlið Landsbankans. Verslunin Edinborg var starfrækt þar um skeið. Húsið brann í miðbæjarbrunanum 1915.

● Syndikatið

Reist á mótum Austurstrætis, Pósthússtrætis og Austurvallar rétt eftir 1900. Vöruhús á þremur hæðum, fyrsta stórverslun landsins þar sem Einar Benediktsson skáld hafði tögl og hagldir. Húsið brann 1915.

● Ingólfshvoll

Verslunar-, skrifstofu- og íbúðarhús reist 1904, á horni Hafnarstrætis og Pósthússtrætis. Húsið skemmdist mikið í brunanum 1915 en var endurreist. Margs konar starfsemi var í húsinu til ársins 1969 en þá var það rifið.

● Bergstaðarstræti 14

Timburhús sem var reist árið 1907 en brann rúmum áratug síðar.

● Völundur

Trésmiðja sem var reist árið 1904 af Sveini M. Sveinssyni á horni Klapparstígs og Skúlagötu. Þar hófst vélvæðing í íslenskum timburiðnaði. Húsið var rifið skömmu fyrir 1990.

Landsbyggð er fasteigna- og þróunarfélag sem sérhæfir sig í uppbyggingar- og umbreytingarverkefnum um allt land. Auk uppbyggingar á Selfossi hefur Landsbyggð nýlega fest kaup á Landsbankahúsinu við Austurstræti 11 og gömlu höfuðstöðvum Landsvirkjunar við Háaleitisbraut 68. Landsbyggð er í eigu Leós Árnasonar og Kristjáns Vilhelmssonar.