Rúrik mætti með kærustuna í brúð­kaupið

Fyrst bárust fréttir af sambandi Rúriks og Sóleyjar í apríl 2023, en þau hafa haldið sambandi sínu utan sviðsljóssins.

Þau hafa mætt saman á fleiri viðburði á liðnum árum og ástin virðist blómstra milli þeirra.

Fegurðardísin Sóley er 27 ára og á bæði ættir að rekja til Íslands og sömuleiðis til Spánar eins og sjá má á eftirnafni hennar.

Landsliðsmaðurinn Sverrir Ingi og Hrefna Dís giftu sig við glæsilega athöfn í Aþenu í Grikklandi nítjánda júní síðastliðinn. Brúðkaupið fór fram undir berum himni og var ævintýri líkast.

Í brúðkaupinu sást til Rúriks með kærustunni, en mynd náðist af þeim saman skemmta sér í veislunni.

Sjá einnig: Stjörnum prýtt brúðkaup landsliðsmanns í Grikklandi

Rúrik Gíslason varð frægur á einni nóttu á heimsmeistaramótinu í knattspyrnu í Rússlandi árið 2018. Eftir leik Íslands við Argentínu fór fylgjendafjöldi hans á Instagram úr þúsund yfir í rúma milljón. Langflestir fylgjendur voru konur í Suður-Ameríku.

Rúrik var á þeim tíma eftirsóttur piparsveinn og hafa ástarmál hans verið áhugaefni fjölmargra síðan. Fljótlega eftir heimsmeistaramótið kynntist hann Nathaliu Soliani, brasilískri fyrirsætu, og voru þau par um tíma. Kom hún meðal annars í heimsókn til Íslands þar sem Rúrik sýndi henni það sem landið hafði upp á að bjóða.

Upp úr sambandi þeirra Nathaliu slitnaði. Í janúar 2022 sást svo til Rúriks og þýsku leikkonunnar Valentinu Pahde á ferðalagi um Ísland. Þau kynnstu við tökur á þýska sjónvarpsþættinum Let's dance.

Eftir farsælan fótboltaferil hefur Rúrik gert garðinn frægan og starfað víða sem fyrirsæta og áhrifavaldur. Þá varð hann stórstjarna í Þýskalandi fyrir óaðfinnanlega danstakta sem skiluðu honum sigri í sjónvarpsþættinum Let's dance árið 2021.

Rúrik er einn af stórstjörnunum í strákahljómsveitinni Ice Guys, sem hefur farið með himinskautum í íslensku tónlistarlífi síðustu ár.