Körfubolti

Endurkomukóngarnir tryggðu sigur á loka­sekúndunni

Ágúst Orri Arnarson skrifar
Pacers stálu sigri í fyrsta leik á heimavelli Thunder.
Pacers stálu sigri í fyrsta leik á heimavelli Thunder. Matthew Stockman/Getty Images

Indiana Pacers unnu enn einn endurkomusigurinn, 111-110 gegn Oklahoma City Thunder í fyrsta leik NBA úrslitaeinvígisins. Tyrese Haliburton tryggði sigurinn með skoti þegar innan við hálf sekúnda var eftir af leiknum, endurkomusigur eftir að Pacers höfðu verið undir allan leikinn.

OKC var á heimavelli og leiddi leikinn með tíu til fimmtán stigum alveg frá fyrsta leikhluta, en Pacers gáfust aldrei upp og stálu sigrinum undir blálokin.

Í lokasóknum leiksins klikkaði Shai Gilgeous-Alexander á erfiðu stökkskoti eftir að hafa mistekist að keyra inn á teiginn. Pacers brunuðu upp hinum og Tyrese Haliburton setti langan tvist til að tryggja sigurinn með 0,3 sekúndur eftir af leiknum. Fyrsta og eina skiptið sem Pacers komust yfir.

Þetta er í fimmta sinn í úrslitakeppninni sem Pacers vinna leik eftir að hafa verið fimmtán stigum undir í fjórða leikhluta. Og fjórða sinn sem Haliburton setur skot, með innan við fimm sekúndum eftir, sem jafnar eða vinnur leik.

Ekkert lið í sögu NBA hefur áður unnið úrslitaeinvígisleik eftir að hafa verið níu stigum undir eða meira, þegar innan við þrjár mínútur eru eftir af leik.

NBA



Fleiri fréttir

Sjá meira


×