Endan­lega búið spil hjá John­son og Martin

Heimildarmaður segir við bandaríska miðilinn People að sambandsslitin virðist vera endanleg að þessu sinni. Hvorki Johnson né Martin hafa tjáð sig opinberlega.

Síðast sást til þeirra saman opinberlega þann 16. maí síðastliðinn í Malibu í Kaliforníu í Bandaríkjunum. Þar áður höfðu þau sést í janúar, hönd í hönd á ferðalagi í Indlandi, þar sem Coldplay var á tónleikaferðalagi.

Í ágúst 2024 bárust sögusagnir um að þau væru hætt saman, en fulltrúi Johnson neitaði því og sagði þau vera hamingjusöm. Þá sagði annar heimildarmaður að þau hefðu gengið í gegnum ýmislegt en væru „á góðum stað“ og reyndu að halda jafnvægi milli einkalífs og vinnu.

Johnson og Martin byrjuðu saman árið 2017 og héldu sambandinu að mestu leyti utan sviðsljóssins. Þau slitu sambandinu stutta stund árið 2019 en byrjuðu aftur saman eftir það. Heimildarmaður sagði í mars 2024 að þau hefðu verið trúlofuð frá árinu 2020, en þau hafi hvorki flýtt sér né haft mikla pressu á að gifta sig.

Átti í góðu sambandi við stjúpbörnin

Í viðtali við tímaritið Bustle sagði Johnson að hún ætti í nánu sambandi við börn Martins og leikkonunar Gwyneth Paltrow, þá Apple og Moses, sem nú eru 21 og 19 ára.

„Ég elska þessi börn eins og líf mitt velti á þeim. Af öllu mínu hjarta,“ sagði hún.

Hún lýsti einnig mikilli aðdáun á Martin: „Ég veit ekki. Ég elska að horfa á hann. Ég gæti horft á hann á hverjum einasta degi. Það er erfitt að útskýra það – eins og ég sé að horfa á uppáhalds manneskjuna mína gera það sem henni finnst skemmtilegast.“