Brad Pitt tjáir sig í fyrsta skipti um skilnaðinn

Jolie sótti um skilnað þann 19. september 2016, eftir tveggja ára hjónaband og tólf ára samband þeirra. Þau náðu loks samkomulagi þann 30. desember síðastliðinn. Saman eiga þau sex börn. 

Pitt ræddi við tímaritið GQ bæði um nýjustu kvikmynd sína og skilnaðinn. Þegar hann var spurður hvort hann hefði fundið fyrir létti þegar skilnaðurinn gekk loks í gegn, svaraði hann: „Nei. Mér fannst þetta ekki stórt. Bara eitthvað sem varð loksins að veruleika. Lagalega.“

Nokkrum dögum eftir skilnaðinn var Brad Pitt sakaður um að hafa misþyrmt börnunum sínum í einkaþotu með því að hafa öskrað ítrekað á þau og beitt þau líkamlegu ofbeldi. Talað var um að það hefði verið örsök skilnaðarins. Hann var ekki ákærður af yfirvöldum og neitaði Jolie að lögsækja hann.

Sjá einnig: Brad Pitt sakaður um að misþyrma börnunum

Fjórum mánuðum síðar birtu hjónin sameiginlega yfirlýsingu þar sem þau sögðust ætla að leysa málið fyrir luktum dyrum og að allar upplýsingar um skilnaðinn yrðu trúnaðarmál. Síðan þá hefur málinu verið líkt við kalt stríð, þar sem ásakanir og upplýsingar á báða bóga hafa lekið til fjölmiðla.

Talsmaður Pitt vildi hvorki staðfesta né tjá sig um samkomulagið í desember, en heimildarmaður sagði í samtali við tímaritið People í mars síðastliðnum að Pitt væri ánægður með að málið væri að baki og að samband hans við nýju kærustuna Ines de Ramon væri mjög gott.

Síðustu ár hafa þau aðallega deilt um forræði yfir börnunum og eignarétti á franska sveitasetrinu og víngerðinni Château Miraval sem er metin á rúma 22,6 milljarða króna. Pitt kærði Jolie í febrúar 2022 fyrir að hafa selt sinn hlut í setrinu. Hún kærði hann til baka og sagði hann vera í hefnigjörnu stríði við sig.