Tap á Vinnslu­stöðinni og fjár­festingar settar á ís

Þetta segir í fréttatilkynningu Vinnslustöðvarinnar vegna aðalfundar félagsins, sem haldinn var í húsakynnum þess í gær. Þar segir að helstu tölur félagsins árið 2024 séu eftirfarandi.

• Velta samstæðunnar var 177 milljónir evra, eða jafnvirði liðlega 26 milljarða króna.
• Tap félagsins var 3,5 milljónir evra eða jafnvirði 500 milljóna króna.
• Bókfærðar heildareignir félagsins námu 422 milljónum evra, eða jafngildi 61 milljarðs króna. Þar af voru heildarskuldir og skuldbindingar félagsins tæpir 44 milljarðar króna.

Þetta sé í annað skipti á síðustu 25 árum sem félagið er rekið með tapi.

Loðnubresti að kenna

Stærsti áhrifaþáttur taprekstrar í fyrra hafi verið loðnubrestur. Því miður hafi raunin orðið sú aftur í ár. Það sé mikið áhyggjuefni fyrir félagið, og um leið allt samfélagið, hversu lítið er vitað um loðnu, hegðun hennar og samspil vistkerfis hafsins.

Fjárfestingar í varanlegum rekstrarfjármunum, aðallega í nýbyggingu botnfiskvinnslu, hafi aukist verulega eða um 19,4 milljónir evra, jafnvirði 2,9 milljarða króna. Samþykkt hafi verið að ekki yrði greiddur arður til hluthafa í ár.

Stjórn félagsins hafi verið endurkjörin. Hana skipi eftirfarandi: Einar Þór Sverrisson, Guðmundur Örn Gunnarsson, Rut Haraldsdóttir, Sigurhanna Friðþórsdóttir og Sigurjón Rúnar Rafnsson. Varamenn séu Eyjólfur Guðjónsson, Guðmunda Áslaug Bjarnadóttir og Herdís Ásu Sæmundardóttir.

Kominn tími á flotann en fjárfestingum frestað

Fram hafi komið í ræðu Guðmundar Arnar Gunnarssonar, stjórnarformanns, að verði boðaðar hækkanir á veiðigjöldum að veruleika muni Vinnslustöðin ekki geta fjárfest eins og gert hafi verið á undanförnum árum.

„Tími er kominn til að endurnýja verulega skipakost félagsins og liggja fyrir teikningar af nýjum þriggja og fjögurra mílna bátum. Smíði þriggja mílna togbáta hafði verið boðin út og verðtilboð höfðu borist. Skipin voru hönnuð með sama hætti og Breki, með stórri og hæggengri skrúfu sem myndi minnka kolefnisspor útgerðar okkar til muna. Stefnt var að því að semja um smíði skipanna á haustdögum, eða í kjölfar þess að við sæjum fram á loðnukvóta á næsta ári. Þessum áformum hefur nú verið slegið á frest vegna stefnu stjórnvalda um að liðlega tvöfalda veiðigjöld,“ er haft eftir honum.

Rétt er að taka fram að Hanna Katrín Friðriksson atvinnuvegaráðherra sagði í gær að fallið hefði verið frá áformum um tvöföldun veiðigjalda. Enn standi þó til að hækka veiðigjöld.

Loks segir að í lok fundar hafi Sigurgeir Brynjar Kristgeirsson, framkvæmdastjóri Vinnslustöðvarinnar, farið yfir áhrif veiðigjalda á fyrirtækið. Nánar verði fjallað um þá yfirferð á næstu dögum á heimasíðu Vinnslustöðvarinnar.