Sé skýrt að ráð­herra hafi verið beittur þrýstingi

„Nei ég fékk því miður ekki svör,“ segir Guðrún Hafsteinsdóttir, formaður Sjálfstæðisflokksins, um fyrirspurn hennar til Kristrúnar Frostadóttur forsætisráðherra á þingi í dag. Guðrún spurði um aðra valkosti sem stóðu Ásthildi Lóu Þórsdóttur til boða sem áttu að hafa verið ræddir á fundir formanna stjórnarflokkanna á fimmtudag. 

Ásthildur Lóa Þórsdóttir bað forseta Íslands lausnar í gær sem ráðherra eftir að fjallað var um að hún hefði átt barn með sextán ára pilti þegar hún sjálf var rétt rúmlega tvítug.

Að sögn Guðrúnar hafa þingmenn Sjálfstæðisflokksins eingöngu lagt áherslu á aðkomu forsætisráðuneytisins í málinu. Beiðni barst ráðuneytinu um einkafund með forsætisráðherra sex dögum áður en fjallað var um málið í fjölmiðlum. Fyrst var fjallað um trúnaðarbrest innan ráðuneytisins en Kristrún hefur þvertekið fyrir það.

„Það gerði ég í dag, krafði forsætisráðherra svara um aðkomu ráðuneytisins að málinu, það var lítið um svör,“ sagði Guðrún.

„Þegar við hugsum svo til þess að forsætisráðherra vissi af þessu í heila viku og gerði ekki neitt fyrr en sama daga og spyrst út að málið sé að fara í fjölmiðla. Þá er boðað til fundar og þá virðist ekkert hafa verið gert annað en að ýta ráðherranum í farveg afsagnar. Á þessari viku voru engin viðtöl, engin athugun, engin greining. Það var ekkert gret til þess að komast að málið fjallaði um í raun. Við viljum fá að vita það og ég tel að þjóðin eigi að fá að vita það hvernig að koma forsætisráðherra var að þessu máli.“

Ráðherra hent undir rútuna

Bergþór Ólasson, þingflokksformaður Miðflokksins, var einnig með fyrirspurn á fundinum sem hann beindi til Þorgerðar Katrínar Gunnarsdóttur, formanni Viðreisnar og utanríkisráðherra. Hann vildi vita hvernig samvinna formannanna þriggja hefði verið

„Það stenst enga skynsemisskoðun að halda því fram að Ásthildur Lóa Þórsdóttir hafi ekki verið beitt þrýstingi hvað afsögn varðar. Þarna er afsögnin komin til áður en að fyrsta frétt birtist þannig það ætti nú að duga til þess að gera lýðnum ljóst að það hafi verið lagst af fullum þunga á hana,“ segir Bergþór.

Hann sagði skoðanaskiptin sem áttu sér stað í liðnum óundirbúnar fyrirspurnir hafa verði sérstakar. Forsætisráðherra hafi verið með tilbúna punkta sem hún hafi lesið upp jafnvel hvað spurt hafi verið um.

„Þannig að það var nú fátt um svör í raun og það virðist vera býsna mikill flótti frá því til að mynda að ræða hvaða aðrir valkostir voru í stöðunni sem að Valkyrjurnar lögðu mikla áherslu á blaðamannafundinum á föstudegi og síðan auðvitað það að ákvörðun hafi einvörðungu verið Ásthildar Lóu þegar liggur fyrir að hún lýsti því yfir að henni þætti þetta ósanngjörn niðurstaða,“ segir Bergþór.

Hann segir það skipta máli hversu mikið formennirnir hafi lagt áherslu á samstöðu innan stjórnarinnar. Furðulegt sé að þegar einn ráðherra finni sig í snúinni stöðu sé honum hent undir rútuna.