Hitler og Stalín, Pútín og Trump

Hitler hóf heimsstyrjöldina til að auka lífsrými Þjóðverja.

Í ágúst 1939 hittust fulltrúar Hitlers og Stalíns, tveggja helstu glæpamanna heimsins.

Tilgangur fundarins var gagnkvæmt samþykki um að innlima sjálstæð ríki í Evrópu.

Skiptingin var þannig tilgreind í samningi þeirra, að Hitler fékk hálft Pólland og Rússar hálft.

Hersveitir þeirra réðust svo saman inn í Pólland og mættust þar í sigurgleði - og skáluðu.

Stalín og hans fólk fékk Eistland, Lettland og Litháen. Stalín fékk að auki Finnland og gerði strax innrás þar. Sú innrás er kölluð vetrarstríðið. Þessu til viðbótar mátti svo hvor þeirra sem nennti fá Bessarabíu, sem að hluta til er núverandi Moldavía.

Þessi svívirða er kölluð griðasáttmáli Hitlers og Stalíns, Kommúnistar á Íslandi sögðu samninginn sýna snilli Stalíns, hann hefði gert sáttmálann við Hitler til að fá aukið svigrúm til að efla rússneska herinn. Stalín kollvarpaði sjálfur þeirri kenningu þegar hann réðist án tafa inn í Finnland og eyddi dýrmætum vopnum og tíma í árás á friðsama þjóð sem engum stóð ógn af.

Er sagan að endurtaka sig?

Forseti Bandaríkjanna tönnlast nú á því, að hann ætli að gera Ameríku mikla aftur.

Hann boðar að hann ætli að innlima Panama.

Hann heldur því fram að Kanada eigi að tilheyra Bandaríkjunum.

Hann ógnar Grænlendingum og fullyrðir að land þeirra tilheyri Ameríku.

Bandaríkjamenn reistu herstöð í Grænlandi til að bæta hernaðarstöðu sína ganvart Rússlandi.

Því er eðlilegt að spyrja: Hafa Trump og Pútin samið? Td. „Ef þú sættir þig við að ég taki Grænland þá skal ég sætta mig við að þú takir Úkraínu og önnur fyrrum Sovét-lýðveldi.“

Trump hefur lýst yfir að vilja eignast Gasaströndina. Með því geta Bandaríkjamenn tryggt sér sjálfir nægan hernaðarstyrk til að gæta olíuhagsmuna í Mið-Austurlöndum.

Þá losna þeir við að hervæða barnadráp og ákærða stríðsglæpamenn síonista í Ísrael.

Eftir að sjónvarp sýndi samtal forseta og varaforseta Bandaríkjanna við forseta Úkraínu þá er eðlilegt að spyrja: Dreymir Pútín og Trump eins og Hitler og Stalín, að skipta ríkjum á milli sín?

Þetta ætti að vera galin spurning, en þegar hún varðar þessa veruleikafirrtu menn er hún því miður ekki galin.

Höfundur er rafiðnaðarmaður.