Harma ó­ná­kvæma til­kynningu Kauphallar

„Í gær birtist frétt á mbl.is með fyrirsögninni: Kauphöll vísar til vafa um rekstrarhæfi Play. Þar var vitnað í athugunarmerkingu Play í Kauphöll og látið í það skína að endurskoðandi hafi gert athugasemd um rekstrarhæfi félagsins í ársreikningi. Það er ekki rétt,“ stendur í tilkynningu frá Play.

Endurskoðandi hafi yfirfarið ársreikninga Play og ekki gert neinar athugasemdir en komið ábendingu á framfæri. Hann hafi bent á að ef markaðsaðstæður skyldu breytast eða áætlanir gangi ekki eftir gæti félagið þurft að sækja aukið fé til að styrkja reksturinn.

„Vegna þessarar ábendingar endurskoðandans ákvað Kauphöllin að athugunarmerkja Play, en fram hefur komið hjá Kauphöllinni að slíkt sé alvanalegt hjá fyrirtækjum skráð á markað.“

Rekstrarhorfur flugfélagsins séu mun betri en áður.

„Óskýrar tilkynningar af þessu tagi og fréttaflutning af þeim valda alvarlegum misskilningi sem veldur félaginu tjóni,“ stendur í tilkynningu. Gengi hlutabréfa í flugfélaginu Play lækkaði um tæp sautján prósent í dag eftir tilkynninguna.