Heimili Walter White til sölu eftir áralangan ágang aðdáenda

Vésteinn Örn Pétursson skrifar 4. janúar 2025 20:23

Aðalsöguhetjur Breaking Bad eru þeir Walter White og Jesse Pinkman. White þekkti efnafræðina upp á hár, en Pinkman var með gangverk fíkniefnamarkaðarins á hreinu.

Einbýlishús sem gerði garðinn frægan sem heimili efnafræðikennarans og fíkniefnabarónsins Walters White í sjónvarpsþáttunum Breaking Bad er nú komið á sölu. Eigendur hússins hafa um árabil þurft að sætta sig við þá miklu athygli sem húsið vekur meðal aðdáenda þáttanna, og þurft að gera ýmsar öryggisráðstafanir.

Frá þessu er greint á vef People. Húsið, sem er í Albuquerque í Nýju-Mexíkó, er 177 fermetrar og er ásett verð fjórar milljónir dollara, eða tæpar 560 milljónir króna.

Breaking Bad fjalla um efnafræðikennarann Walter White sem greinist með krabbamein, söðlar þá um og gerist stórtækur fíkniefnaframleiðandi og -sali, í því skyni að sjá sér og fjölskyldu sinni farborða meðan á dýrri læknismeðferð stendur.

Athyglin varð fljótt að vandamáli

Líkt og áður sagði var húsið notað sem heimili fjölskyldunnar í þáttunum, og margar ódauðlegar senur í sjónvarpssögunni teknar þar upp. Frá því þáttaröðin rann sitt skeið árið 2013 hefur húsið dregið að sér fjölda aðdáenda þáttanna, sem taka myndir af sér fyrir utan húsið á öllum tímum sólarhringsins.

Í umfjöllun People er haft eftir Joanne Quintana, sem ólst upp í húsinu, að tilviljun ein hafi ráðið því að móðir hennar kom til dyra þegar framleiðendur þáttanna óskuðu eftir því að fá að nota það í verkefnið. Fjölskyldan hafi slegið til og notið þess mjög að vera á tökustað, kynnast leikurum þáttanna og fá innsýn í ferlið á bak við framleiðslu stórra sjónvarpsþátta.

„Síðan fóru aðdáendurnir að koma. Við fórum út og tókum myndir með þeim, ég og mamma,“ segir Quintana. Hin stöðuga athygli sem fylgdi því að eiga jafn þekkt hús hafi hins vegar fljótlega borið fjölskylduna ofurliði. Eins hafi verið dæmi um að aðdáendur hafi stolið munum af lóð hússins, vafalaust til að eiga sem minjagripi um uppáhalds sjónvarpsþættina sína.

Dularfullur pakki stílaður á Walter White

Quintana minnist þess sérstaklega að eina nóttina hafi dyrabjöllunni verið hringt um klukkan hálf fimm um nótt. Við útidyrahurðina hafi verið pakki, stílaður á Walter White. Lögreglan hafi verið kölluð til ásamt sprengjuleitarsveit, þar sem ómögulegt væri að segja hvað leyndist í pakkanum.

Þetta hafi leitt til þess að fjölskyldan hafi þurft að gera öryggisráðstafanir, setja upp hreyfiskynjara við húsið og stærðarinnar girðingu, til að varna því að fólk gæti valsað óáreitt upp að hússins dyrum.

Viljir þú eignast þetta hús, sem á sér tryggan sess í sjónvarpssögunni, þarftu að greiða um 560 milljónir króna fyrir.AP/Russell Contreras

„Bræður mínir sögðu að þarna væri nóg komið,“ segir Quintana sem telur að um 300 bílar hafi ekið fram hjá húsinu á degi hverjum. Að endingu hafi stöðug athygli sem beindist að húsinu verið of mikil vinna, samhliða því að sjá um aldraða foreldra hennar, sem hafa búið í húsinu frá 1973.

Mál að linni

Á vef People er ekki fullyrt að hin mikla og á tímum yfirþyrmandi athygli sé ástæða þess að húsið er nú til sölu, en leiða má að því líkur að hún spili inn í.

„Þetta var heimili fjölskyldunnar frá 1973, í næstum 52 ár. Við göngum héðan í burtu með minningarnar okkar. Það er kominn tími til að leita á ný mið. Þetta er búið, það er engin ástæða til að berjast við þetta lengur,“ segir Quintana.

Líkt og áður sagði er ásett verð hússins um 560 milljónir króna. Erfitt er að segja hvort mögulegir kaupendur veigri sér við að greiða slíkt verð fyrir húsið, þegar áreitið sem fylgir því er jafn mikið og núverandi eigendur lýsa, eða hvort einhver ofuraðdáandi Breaking Bad sæti færis og festi kaup á húsinu.

Bíó og sjónvarp Bandaríkin Hollywood