Skoða dóms­átt í barnaníðsmáli ís­lensks morðingja

Daníel er 23 ára gamall. Faðir hans er íslenskur en móðir hans er af tékkneskum uppruna. Mæðginin fluttu til borgarinnar Ridgecrest í Kaliforníu þegar Daníel var ungur, en brotin sem hann hefur verið sakfelldur fyrir áttu sér stað í Kern-sýslu Kaliforníu-ríkis, líkt og þau brot sem hann er nú grunaður um.

Hann er nú ákærður fyrir að þvinga barn undir tíu ára aldri til munnmaka eða samneytis fjórum sinnum. Og fyrir lostafulla hegðun gagnvart barni undir fjórtán ára aldri, en þau brot á hann líka að hafa framið fjórum sinnum. Einnig er honum gefið að sök að hafa haft í vörslum sínum 600 myndir sem sýndu barnaníðsefni.

Þolandinn í málinu segir Daníel hafa framið þessi meintu brot í nokkur skipti frá árinu 2016 til 2021. Daníel neitaði sök við fyrirtöku málsins í byrjun aprílmánaðar.

Réttarhöld í nýja málinu áttu að hefjast í dag. Verjandi Daníels óskaði eftir því síðastliðinn miðvikudag að réttarhöldunum yrði frestað vegna þess að samningaviðræður um dómsátt væru að eiga sér stað. Málið verður aftur tekið fyrir í næstu viku.

Staðarmiðillinn KGET greinir frá þessu.

Dæmdur fyrir hrottalegt morð

Í september í fyrra var Daníel sakfelldur fyrir að myrða hina 21 árs gömlu Katie Pham í maí 2021. Nokkrum vikum síðar ákvarðaði dómari refsingu Daníels, sem hlaut dóm sem fer frá því að varða 25 ára fangelsisvist upp í lífstíðarfangelsi.

Pham og Daníel höfðu átt í skammlífu ástarsambandi, en þau voru einnig bekkjarsystkini.

Manndrápið var framið með ísnál. Daníel var sagður hafa snert lík hennar á kynferðislegan hátt en hann var einnig sakfelldur fyrir að limlesta líkið.