James feðgarnir sam­einast í liði Los Angeles Lakers

Um söguleg tíðindi gæti verið að ræða ef aðeins er litið á þá staðreynd að aldrei áður hafa feðgar spilað með sama liðinu í leik í NBA deildinni. Það gæti breyst á næsta tímabili en með fimmtugasta og fimmta valrétt sínum valdi Los Angeles Lakers Bronny James í lið sitt. 

Bronny, nítján ára gamall, er elsti sonur LeBron James sem hefur skipað sér nafn sem einn allra besti körfuboltamaður sögunnar og hefur hann á sínum ferli fjórum sinnum orðið NBA meistari og fjórum sinnum verið valinn verðmætasti leikmaður deildarinnar. 

Bronny ákvað að gefa kost á sér í nýliðaval NBA deildarinnar eftir aðeins eitt tímabil með liði USC háskólans þar sem að hann var að meðaltali með 4,8 stig í leik, 2,8 fráköst og 2,1 stoðsendingu og spilaði að meðaltali 19,4 mínútur í leik.

Bronny gekk til liðs við lið USC á miðju tímabili en þar áður hafði hann gengið í gegnum krefjandi tíma utanvallar eftir að hafa farið í hjartastopp. 

Samningur LeBron James við Los Angeles Lakers er að renna út og hefur hann til 29.júní næstkomandi til þess að virkja ákvæði í þeim samningi og halda inn í næsta tímabil með liðinu. Það yrðu nú að teljast tíðindi ef faðirinn myndi ekki virkja það ákvæði og kveðja liðið nú þegar að sonurinn er mættur.