Miðflokksmenn í­huga að leggja fram van­trausts­til­lögu

Þetta hefur Morgunblaðið eftir Bergþóri Ólasyni, þingmanni Miðflokksins.

Í vikunni veitti Bjarkey Hval hf. leyfi til veiða á samtals 128 langreyðum. Veiðileyfið nær aðeins yfir þetta ár. Síðan hefur Kristján Loftsson, stærsti eigandi Hvals hf. sagt að sér þyki ólíklegt að hann muni veiða hval í sumar, aðallega vegna þess hversu langt er liðið á veiðitímabilið.

Rætt var um málið á Alþingi í gær. Þar spurði Bergþór Bjarkeyju út í hvort aðrir ráðherrar hefðu beitt hana þrýstingi við ákvarðanatökuna.

„Þeir beittu mig ekki þrýstingi og ég er þakklát fyrir það. Ég tel að það séu eðlileg vinnubrögð innan ríkisstjórnar að ráðherrar fái tækifæri og rými til að taka sínar ákvarðanir, hvort sem það snýr að hvalveiðum eða einhverju öðru slíku. Ég myndi ekki beita annan ráðherra þrýstingi vegna þess að mér fyndist eitthvað um eitthvert tiltekið mál sem væri til umfjöllunar. Svo svarið er nei,“ sagði Bjarkey.

Bergþór spurði jafnframt út í lengd veiðileyfisins. Hann vildi fá að vita til hversu langs tíma henni hefði verið ráðlagt að veita leyfið. Bjarkey sagði að þeir hefðu ráðlagt henni að fara ekki fram yfir tvö ár, og því hafi í raun verið í boði að velja eitt ár eða tvö ár og hún valið fyrri kostinn.

„Hún fór eins og kött­ur í kring­um heit­an graut í svari sínu en gat ekki sagt að hún hefði fengið ráðgjöf um að veita hval­veiðileyfi til eins árs,“ sagði Bergþór við Morgunblaðið um svar hennar.

„Þetta seg­ir mér að ráðherr­ann hef­ur ekki farið að ráðlegg­ing­um sér­fræðinga sinna í ráðuneyt­inu held­ur spilað póli­tísk­an leik þvert á lög og regl­ur. Það kom líka á óvart þegar ráðherr­ann upp­lýsti eft­ir rík­is­stjórn­ar­fund síðastliðinn þriðju­dag að hún hefði ekki verið beitt nein­um þrýst­ingi í mál­inu af öðrum ráðherr­um rík­is­stjórn­ar­inn­ar.”

Bergþór segir að hafi aðrir ráðherrar ekki þrýst á hana sé það til marks um að Sjálfstæðis- og Framsóknarmenn séu hættir að líta til með málinu.