Oppenheimer fjallar, eins og frægt er orðið, um samnefndan eðlisfræðing sem kom að þróun fyrstu kjarnorkuvopnanna, sem notast var við í kjarnorkuárásunum í Hiroshima og Nagasaki í seinni heimsstyrjöldinni.
Sprengingin ekki sýnd
Fréttaveitan Associated Press ræddi við mann sem lifði kjarnorkuárásina af og hafði lagt sér leið í bíó. Toshiyuki Mimaki var þriggja ára gamall þegar árásirnar voru gerðar og situr nú í stjórn bandalags Japana sem lifðu af sprengingarnar tvær.
Í samtali við blaðamann AP sagðist hann hrifinn af sögunni um Robert J. Oppenheimer, sem hefur verið kallaður faðir kjarnorkusprengjunnar.
„Hvað voru Japanarnir að hugsa, að gera þessa árás á Pearl Harbor og byrja þar með stríð sem þeir áttu aldrei tækifæri á að sigra,“ segir Mimaki.
Hann segir frá því að hafa séð myndina á forsýningu, og beðið eftir atriðinu þegar Hiroshima var sprengd, sem kom síðan aldrei.
Skiptar skoðanir
Þrátt fyrir að bíómyndin snúist að miklu leyti um árásirnar tvær fjallar hún að mestu leyti um Oppenheimer sjálfan og persónuleg vandamál hans.
Takashi Hiraoka, fyrrverandi borgarstjóri Hiroshima, flutti ræðu á forsýningunni þar sem hann gagnrýndi myndina og það sem kom fram í henni, eða ekki.
„Frá sjónarhorni Hiroshima var sá hryllingur sem þessi kjarnorkuvopn höfðu í för með sér ekki sýndur nægilega vel,“ höfðu japanskir miðlar eftir honum. „Myndin var gerð til þess að staðfesta þá niðurstöðu að kjarnorkusprengjan hafi verið notuð til að bjarga lífum Bandaríkjamanna,“ bætti hann við.
AP náði tali af tveimur öðrum bíógestum sem gáfu myndinni mikið lof. Einn þeirra sagði myndina frábæra, enda mikið áhugaefni Japana þrátt fyrir að vera í leiðinni viðkvæmt málefni fyrir marga. Annar sagðist agndofa yfir atriðunum sem fjalla um innri óróa Oppenheimer.
