Kínverjar æfir út í G7 ríkin

Leiðtogar G7 ríkjanna sem funduðu um helgina í Hiroshima sendu frá sér yfirlýsingu þar sem Kínverjar eru varaðir við því að hernaðarbrölt þeirra á Kyrrahafi geti haft alvarlegar afleiðingar. Strax eftir fundinn var sendiherra Japana í Beijing kallaður á teppið þar sem formleg mótmæli gegn yfirlýsingunni voru afhent.

Þá voru Bretar einnig varaðir við því að slík hegðun gæti haft áhrif á tvíhliða samskipti ríkjanna. Að auki var bandarísku fyrirtæki sem framleiðir örgjörva, Micron Technology, tilkynnt að ekki megi nota vörur þeirra á hinum sístækkandi markaði í Kína.

Í yfirlýsingu G7 ríkjanna var raunar talað um að hópurinn vilji stöðug og uppbyggileg samskipti við Kína og var sérstaklega talað um þörfina á því að draga úr spennunni á svæðinu frekar en að hætta samskiptum við Kínverja, sem hafa verið að færa sig meira upp á skaftið hernaðarlega síðustu árin, ekki síst á Suður-Kínahafi, nágrönnum sínum til ama.