Fréttastofa hefur undanfarna daga fjallað ítarlega um sjúkdóminn SMA, Spinal Muscular Atrophy, og þá einstaklinga sem við hann glíma. Af þeim fimmtán sem eru með sjúkdóminn hér á landi fá ellefu ekki lyf þau tvö lyf sem standa til boða, þar sem meðferð getur ekki hafist eftir átján ára aldur.
Ísland hefur hingað til fylgt fordæmi Norðurlandanna með aldurstakmörk en í vikunni ákváðu norsk yfirvöld að leyfa fullorðnum að fá lyfið Spinraza. Það gæti breytt stöðunni hér á landi að sögn Willums Þórs Þórssonar heilbrigðisráðherra.
„Norðurlöndin hafa fylgst að í þessu máli og heimilað þetta lyf fyrir undir átján ára. En þarna er tekin ný ákvörðun og væntanlega eru einhver ný gögn sem að liggja að baki og þá geri ég ráð fyrir að Lyfjanefndin bregðist hratt við,“ segir Willum.
Í svari Landspítala við fyrirspurn fréttastofu vegna málsins kemur fram að ákvörðun um innleiðingu nýrra lyfja þurfi að vera í sífelldri endurskoðun í samræmi við vaxandi vísindalega þekkingu. Ef vísindalegur grunnur fyrir notkun lyfsins fyrir fullorðna hafi styrkst gefi ákvörðun norskra yfirvalda, sem og annarra nágrannalanda, mögulega tilefni til að endurmeta aðgengi að lyfinu og flokkun.
Sjúkratryggingar Íslands taka ekki þátt í kostnaði við lyfið fyrir sjúklinga með SMA en spítalinn hefur greitt lyfið fyrir börn, að því er segir í svarinu. Flokkun lyfsins og ákvörðun um greiðsluþátttöku og verð er í höndum Lyfjastofnunar en Lyfjanefnd spítalans tekur sömuleiðis ákvörðun um einstaklingsbundna greiðsluþátttöku fyrir einstaklinga eða hópa.
Kona með sjúkdóminn sem rætt var við í kvöldfréttum fyrr í vikunni sagðist telja að kostnaður væri ráðandi þátturinn en lyfið kostar tugi milljóna á ári. „Ef að gagnsemin er óyggjandi þá á kostnaðurinn ekki að vera hindrun,“ segir Willum aðspurður um hvort svo sé.
Ættu að vera tiltölulega fljót að fara í málið
Hópur fólks með sjúkdóminn sendi í dag opið bréf til heilbrigðisráðherra þar sem skorað var á hann að leyfa fullorðnum að fá lyf við sjúkdóminum en ákvörðun íslenskra stjórnvalda væri ekki byggð á vísindalegum rökum, rannsóknir hafi sýnt fram á gagnsemi lyfsins hjá fullorðnum.
„Við teljum að í þessu máli sé lítið gert úr þeim þætti að góðar líkur séu á að lyfið geti hægt á hrörnuninni eða stöðvað hana. Aukinn styrkur eða færni væri þá í raun fram úr væntingum. Hver einasti mánuður sem við þurfum að bíða skiptir máli því framþróun sjúkdómsins heldur áfram dag frá degi, og því liggur á að fá lyfin samþykkt svo núverandi geta og kraftar haldist,“ segir í bréfinu.
Hver einasti mánuður í bið skipti máli og það liggi á að fá lyfin samþykkt svo núverandi geta og kraftar haldist.
„Ég hugsa bara að okkar færustu sérfræðingar og Lyfjanefndin verði bara að kalla eftir þessum gögnum og meta hvað liggur til grundvallar og þá endurmeta. Auðvitað er fylgst þannig með að nefndin ætti að vera tiltölulega fljót að komast að því og geta farið í þetta. „Ég reikna með að við getum unnið þetta hratt enda ákallið skiljanlega mjög sterkt.“
Það sé fagnaðarefni að geta mögulega hjálpað fleiri einstaklingum.
„Það er alltaf gleði þegar það verður framþróun í lyfjum og meðferðum og hún verður hröð á næstu árum, ekki síst á þessu sviði,“ segir Willum.
Einnig var rætt við heilbrigðisráðherra í Reykjavík síðdegis í dag en það viðtal má finna í spilaranum hér fyrir neðan.
