Fimm þúsund heima­prjónaðar lopa­flíkur sendar til Úkraínu í dag

Níu tonn af vetrarbúnaði voru um borð í kanadískri herflugvél sem flaug frá Keflavíkurflugvelli til Úkraínu í dag. Þar mátti meðal annars finna sjúkragögn, hlífðarfatnað frá íslenskum útivistarfyrirtækjum, eins og 66°C, Dynjanda og Fjallakofanum, en ekki síst heimaprjónuð vetrarklæði sem var afrakstur sjálfboðavinnu þúsunda Íslendinga.

„Það er auðvitað það sem er, í mínum huga, ekki bara táknrænt heldur er það raunverulegt framlag og við höfum fengið að heyra það innnan úr höfuðstöðvum NATO að hlýr fatnaður sem raunverulega tryggir hlýja kroppa eru jafn mikilvægir og vopnin sem hermenn þurfa að hafa til að geta tekið til varnar Úkraínu,“ segir Þórdís Kolbrún Reykfjörð Gylfadóttir utanríkisráðherra. 

„Þetta er auðvitað mikið samstarfsverkefni. Við erum hérna í samstarfi við kanadíska herinn og aðila hérna á Íslandi. Landhelgisgæslan hefur staðið framúrskarandi vel að utanumhaldi og skipulagningu á þessu verkefni,“ bætir Þórdís við. 

Sérðu fyrir þér að þetta verði gert aftur?

„Mér finnst það ekki ólíklegt. Ég sé fyrir mér að áfram verði þörf á hlýjum fötum enda köldustu vikurnar rétt að byrja.“

Andlegi stuðningurinn ekki síst mikilvægur

Flugvélin lenti á Keflavíkurflugvelli rétt fyrir klukkan eitt í dag. Hún hélt svo áfram til Úkraínu, þar sem hún lendir í kvöld, hlaðin þessum prjónavörum. Þar eru 3.500 lopasokkar frá hópnum Sendum hlýju og minnst 1.400 lopapeysur og -teppi sem íslenskt og úkraínskt handavinnufólk hefur prjónað á svonefndum hannyrðahittingum eða gefið í söfnunina.

„Það er svo dásamlegt hvað Íslendingar hafa tekið öflugan þátt. Fólk út um allt land frá elliheimilum, skólum og fólk sem hefur verið að framleiða til að selja og ákvað að gefa, mikið magn í sumum tilvikum,“ segir Heiðrún Hauksdóttir sjálfboðaliði hjá Sendum hlýju.

„Þetta eru svo mikilvæg skilaboð. Við erum að senda hlýju, ekki bara eiginlegri merkingu, heldur andlegi stuðningurinn. Að þú finnir að einhver nyrst í heimi hafi sent þetta og haft fyrir að prjóna.“

Vildu senda ættingjunum hlý föt

Margir sjálfboðaliðanna eru úkraínskar konur sem byrjuðu á að senda ættingjum hlý föt.

„Það eru svona tutttugu úkraínskar konur sem koma reglulega. Við byrjuðum í vor og síðan hafa margar fengið vinnu, svo hætta þær og þá koma nýjar í staðin. Við erum búin að fá rosalega mikið gefins frá fólkinu í landinu,“ segir Birgit Raschhofer, sjálfboðaliði. 

Birgit stofnaði hannyrðahóp fyrir Úkraínumenn ásamt nokkrum öðrum íslenskum konum eftir að ung flóttakona leitaði til hennar.

„Hún var nýkomin, átti engin föt og sonur hennar sem var fjögurra mánaða átti heldur engin föt. Svo fór ég með föt til hennar og sá að það var fullt af úkraínskum konum í miðstöð úkraínskra flóttamanna í Guðrúnartúni sem höfðu ekkert að gera. Þá sendi ég út skeyti á Facebook og bað um smá garn og prjóna og fór með til þeirra,“ segir Birgit. 

„Svo hugsaði ég með mér að þetta væri bara vitleysa, við ættum bara að hafa prjónakvöld.“

Mikið samfélag hafi skapast í kringum hópinn, sérstaklega þegar ástandið úti er slæmt og margar konur heyra jafnvel ekki frá mönnunum sínum og börnum í marga daga í senn. 

„Af því þeir komast ekki í net eða síma. Þá fá þær hjá okkur faðmlag og öxl til að gráta á,“ segir Birgit. 

Konurnar hafi margar viljað senda ættingjum sínum í Úkraínu hlý föt fyrir veturinn.

„Svo rúllaði boltinn og hann stækkaði og stækkaði. Svo fór Utanríkisráðuneytið í Sendum hlýju verkefnið með sokkana og þeir samþykktu að senda allt sem við söfnuðum með.“