VERA mathöll hefur opnað dyrnar

Opnunin gekk eins og í sögu

„Helgin gekk bara eins og í sögu. Það var frábær mæting og mikil stemning. Við erum bara alveg í skýjunum með þetta,“ segir Björn Bragi Arnarsson, eigandi og framkvæmdastjóri VERU.

Af þeim átta stöðum sem verða í höllinni eru þrír þeirra með fyrri staðsetningar en það eru: Pünk Fried Chicken sem hefur starfað í Gróðurhúsinu í Hveragerði, pizzastaðurinn Natalía úr Borg29 og vínbarinn og kaffihúsið Mikki Refur af Hverfisgötu. 

Fimm nýir staðir

Hinir fimm staðirnir eru nýir en þar er um að ræða mexíkóska staðinn Caliente, Bang Bang sem sérhæfir sig í asískum mat, súpustaðinn Næru, morgunverðarstaðinn Stund og Furu sem er nýr staður í eigu verðlaunakokksins Denis Grbic.

„Við erum einstaklega ánægð með þessa sametningu af stöðum. Það er fjölbreyttur og góður matur í boði og svo er andinn í húsinu hrikalega góður,“ segir Björn Bragi.

Hönnun frá HAF Studio

Hönnun staðarins var í höndum Hafsteins Júlíussonar og hönnunarstofu hans, HAF Studio. „Þeim hefur tekist að skapa ótrúlega flotta heildarmynd, þannig að maður upplifir að maður sé að koma inn á einn stóran veitingastað, en á sama tíma ná þessir átta ólíku staðir að njóta sín hver fyrir sig,“ segir Björn.

Ljósmyndarinn Árni Beinteinn mætti á opnunarkvöldið og fangaði stemninguna þar sem margt var um manninn en myndir frá opnuninni má sjá hér að neðan: