Mjöll hafði betur gegn sitjandi for­manni grunn­skóla­kennara

Þetta kemur fram á vef Kennarasambands Íslands. Rafræn kosning um formann fór fram í vikunni og lauk henni klukkan 14 í dag. Mjöll hlaut 1.034 atkvæði, eða 41,53%.

Þorgerður Laufey Diðriksdóttir, fráfarandi formaður félagsins, hlaut 738 atkvæði, eða 29,64% og Pétur V. Georgsson hlaut 593 atkvæði, eða 23,82%

Rétt áður en kosningar hófust lak niðurstaða samskiptaskýrslu sem gerð var innan félagsins. Í henni kom fram að samskipti Þorgerðar Laufeyjar við annan starfsmann flokkuðust sem einelti. 

Þegar málið var rætt á framboðsfundi sagði Þorgerður að það væri vilji beggja málsaðila að komast að sáttum og þótti henni leitt að skýrslunni hafi verið lekið.

Formannsskipti fara fram á aðalfundi Félags grunnskólakennara sem fer fram í haust. Mjöll mun sitja sem formaður til ársins 2026.