Landspítalinn hafði ekki vitneskju um umfang meintra brota

Stjórnendur Landspítala komu saman til fundar í dag eftir að fréttir birtust af því að lögregla teldi að andlát sex einstaklinga hafi verið ótímabær og borið að með saknæmum hætti. Fimm önnur dauðsföll eru til skoðunar, en Skúli er talinn hafa skráð þessa einstaklinga í lífslokameðferð að tilefnislausu. Spítalinn hyggst funda með landlækni á morgun og meta framhaldið.

Þá segir Alma D. Möller landlæknir í samtali við fréttastofu að embættið hafi heldur ekki verið meðvitað um öll þessi tilfelli. Óskað hafi verið eftir upplýsingum frá lögreglu um leið og fréttir af málinu birtust.

„Það komu fram upplýsingar sem kalla á það að embættið mun óska eftir frekari upplýsingum frá lögreglu, en ég get að öðru leyti ekki tjáð mig um einstök mál,“ segir hún.

Greint var frá því í morgun að Skúli Tómas hefði nýverið fengið endurnýjað tímabundið starfsleyfi, en hann var sviptur réttindum sínum eftir að landlæknir gerði ítarlega úttekt á störfum hans í tengslum við andlát eins sjúklings. Sú skýrsla var svört og var Skúli Tómas sagður hafa vanrækt skyldur sínar sem læknir og gert röð alvarlegra mistaka.

Landlæknir krefst upplýsinga

Alma getur ekki tjáð sig um þetta tiltekna mál en getur svarað því undir hvaða kringumstæðum læknar eru sviptir réttindum sínum.

„Málin eru afskaplega ólík og við verðum að starfa miðað við þann lagaramma sem okkur er settur. Landlæknir getur svipt starfsmann starfsleyfi, til dæmis vegna veikinda eða vegna faglegrar vanhæfni og sé hann metinn óhæfur um að sinna starfi sínu. Þetta er mjög íþyngjandi úrræði þannig að það þarf að vanda mjög ákvarðanatökuna. Það er unnið eftir stjórnsýslulögum og það þarf að hafa það í huga að það er ekki hlutverk embættisins að refsa – það er annarra stjórnvalda – heldur að tryggja að faglega sé unnið og örugglega,“ segir hún.

Og hvað þarf að koma til þess að einstaklingur fái starfsleyfi sitt aftur?

„Það fer eftir ástæðum sviptingar. Ef ástæðan voru veikindi þá þarf viðkomandi að hafa fengið viðeigandi meðferð við sínum veikindum. Ef það er vegna faglegrar vanhæfni þá þarf að hafa farið fram endurhæfing sem er ýmist endurmenntun eða þjálfun. Þegar þeirri endurhæfingu er lokið er hægt að sækja um starfsleyfi,“ segir hún. „En það er aldrei veitt fullt starfsleyfi strax, heldur eru þau oftast bæði takmörkuð og tímabundin og á meðan er viðkomandi undir sérstöku eftirliti.“

Ítrekað hafa ratað í fréttir kvartanir á hendur Heilbrigðisstofnun Suðurnesja. Alma segir að við þeim hafi verið brugðist og að það horfi til betri vegar.

„Við höfum farið í úttektir hvað varðar heilsugæsluna, þar hefur verið gripið til ýmissa úrbóta, og á sjúkradeildinni en sú skýrsla verður birt á næstunni. Okkar hlutverk er að benda á tækifæri til úrbóta og fylgja þeim eftir.“

Heilbrigðisstofnun Suðurnesja hefur ekki svarað fyrirspurnum fréttastofu, þrátt fyrir ítrekaðar tilraunir síðan í febrúarmánuði. Hins vegar sendi stofnunin frá sér eftirfarandi yfirlýsingu:

Vegna umfjöllunar fjölmiðla í dag um alvarleg atvik sem Heilbrigðisstofnun Suðurnesja (HSS) hefur, lögum samkvæmt, tilkynnt til lögreglu og Embættis landlæknis er nauðsynlegt að koma því á framfæri að ómögulegt er að tjá sig um slík mál enda eru stofnunin og starfsfólk hennar bundin trúnaði. Eftir að stofnunin sendir mál til meðferðar til lögreglu fær stofnunin engar upplýsingar um framvindu máls. HSS mun ekki tjá sig um mál sem vísað hefur verið til lögreglu eða landlæknisembættisins.

Þá segir lögmaður Skúla Tómasar að hann sé bundinn þagnareið og geti því engum fyrirspurnum svarað um málið.