Róbert Wessman stækkar vínveldið

Nýja vínekran kallast Vignoble des Verdots en auk hennar festi Róbert kaup á verslunarhúsnæði í Saint Cernin de Labarde. Víngarðurinn er staðsettur í Conne de Labarde, á landi sem er a mestu úr leir, tinnu og kalksteini að því er fram kemur í fréttatilkynningu. 

Á ekrunum eru bæði ræktaðar hvítar þrúgutegundir, af gerðunum Sémillon, Sauvignon Blanc og Sauvignon Gris et Muscadelle, og rauðar þrúgutegundir af gerðunum Merlot, Cabernet Sauvignon, Cabernet Franc og Malbec. 

Róbert hefur ásamt eiginkonu sinni Kseniu Shakhmanova rekið vínframleiðslu á Chateau St. Cernin og framleitt þar vín eins og N°1 Saint-Cernin Rouge, N°1 Saint-Cernin Blanc og Champagne Wessman One. Hjónin buðu til dæmis upp á vínið í brúðkaupsveislu sinni í sumar. 

Samkvæmt tilkynningunni er öll framleiðsla Vignoble des Verdots sjálfbær en um 150 þúsund flöskur af Clos des Verdots, Château  les Tours des Verdots og Grand Vin les Verdots voru framleiddar þar á síðasta ári. 

„Gæði Bergerac-vínanna er mikil en þau hafa ekki náð heimsathygli líkt og stóru frönsku vínin,“ segir Róbert Wessman í tilkynningu. 

„Fyrir tæpum 20 árum keypti ég Château de Saint-Cernin, sem er nálægt Bergerac. Það gerði mér kleift að uppgötva hve frábær vínin eru í Bergerac. Það felast mikil tækifæri að auka veg þessara vína. Ég hef alltaf verið sérstaklega hrifinn af Vignoble des Verdots vínunum og markmið mitt er að vinna að því að þau komist á þann stall sem þau eiga skilið á alþjóða vettvangi,“ segir Róbert Wessman.