Þegar hefur Frjálslyndi lýðræðisflokkurinn kynnt lista í fjórum kjördæmum, þ.e. öllum nema Reykjavík suður og Suðvesturkjördæmi. Þeir listar eru væntanlegir eftir helgi. Guðmundur Franklín Jónsson forsetaframbjóðandi er formaður flokksins. Hann fékk tæp 8% í forsetakosningum í fyrra og er bjartsýnn fyrir þingkosningum í haust.
„Ég er ekki í nokkrum vafa um það að við fáum á milli sjö til tíu prósent og við náum inn fimm, sex mönnum,“ sagði Guðmundur Franklín Jónsson í hádegisfréttum Bylgjunnar.
Orkumálin eru í brennidepli hjá flokknum. Guðmundur segir að „vinda þurfi ofan af orkupökkunum“ og að koma þurfi í veg fyrir sölu Landsvirkjunar, sem nú standi yfir.
Þar vísar Guðmundur að líkindum til hugmynda forstöðumanns Hagfræðistofnunar Háskóla Íslands um að skipta upp Landsvirkjun til að koma á virkari samkeppni á rafmagnsmarkaði.
Sæki ekki fylgi til íhaldsflokka eins og Sjálfstæðisflokks
Að öðru leyti eru stefnumál Frjálsa lýðræðisflokksins fjölbreytt.
„Við ætlum að berjast gegn spillingu. Það er okkar aðalmarkmið, að berjast spillingu og við viljum líka lækka skatta. Við viljum taka af þessar skerðingar fyrir eldri borgara og öryrkja og berjast gegn þessu óréttláta kvótakerfi, arðráninu sem er í gangi,“ sagði Guðmundur.
Aðrir flokkar kunni að kenna sig við frjálslynt lýðræði en sýni það ekki í verki.
„Það eru svona íhaldsflokkar eins og til dæmis Sjálfstæðisflokkurinn sem hefur ekki gert annað en að svíkja sína kjósendur með sífelldum skattahækkunum og skerðingum á aldraða undanfarin tíu ár.“
Myndirðu segja að hann væri ykkar helsti keppniautur um atkvæði?
„Nei, ég held að það sé hinn flokkurinn, Miðflokkurinn, sem þykist vera frjálslyndur líka. Ég held að hann verði nú aðal samkeppnisaðilinn um atkvæðin vegna þess að mér sýnist að Miðflokkurinn sé í frjálsu falli og svo náttúrulega kannski einhverjir frá Flokki fólksins, ég veit það ekki,“ sagði Guðmundur, sem tók þó fram að hann gleddist ekki yfir óförum þessara flokka.
Miðflokkurinn mælist í seinustu könnun fyrir fréttastofuna með 5,1% fylgi og Flokkur fólksins með 4,2%.
Fjögur kjördæmi komin
Listarnir sem þegar hafa verið kynntir eru sem hér segir:
Reykjavíkurkjördæmi norður
- Guðmundur Franklín Jónsson, hagfræðingur
- Auðunn Björn Lárusson, leiðsögumaður
- Örn Helgason, framkvæmdastjóri
- Andrés Zoran Ivanovic, ferðaskipuleggjandi
- Íris Lilliendahl, löggiltur skjalaþýðandi
- Haraldur Kristján Ólason, bílstjóri
- Sverrir Vilhelm Bernhöft, framkvæmdastjóri
- Þröstur Árnason, tæknimaður
- Óskar Örn Adolfsson, öryrki
- Dagmar Valdimarsdóttir, öryrki
Suðurkjördæmi
- Magnús Ívar Guðbergsson, skipstjóri
- Inga Jóna Traustadóttir, öryrki
- Birkir Pétursson, bílstjóri
- Heimir Ólafsson, bóndi
- Alda Björk Ólafsdóttir, forstjóri
- Þórarinn Þorláksson, verkamaður
- Steinar Smári Guðbergsson, framkvæmdarstjóri
- Þórarinn Baldursson, vélamaður
- Víðir Sigurðsson, smiður
- Ingibjörg Fanney Pálsdóttir, matsveinn
Norðausturkjördæmi
- Björgvin Egill Vídalín Arngrímsson, eldri borgari
- Hilmar Daníel Valgeirsson, framkvæmdarstjóri
- Halina Kravtchouk, yfirþerna
- Gestur Helgi Friðjónsson, öryrki
- Valgeir Sigurðsson, veitingamaður
- Óskar Steingrímsson, rekstrarstjóri
- Fannar Eyfjörð Skjaldarson, bílstjóri
- Höskuldur Geir Erlingsson, múrarameistari
- Vilhjálmur Ragnarsson, vélvirkjameistari
- Edda Lára Guðgeirsdóttir, fótaaðgerðarfræðingur
Norðvesturkjördæmi
- Sigurlaug Guðrún Inga Gísladóttir, verslunamaður
- Jóhann Bragason, rafvirki
- Hafþór Magnússon, sjómaður
- Jón Sigurðsson, smiður
- Reynir Sigurður Gunnlaugsson, iðnaðarmaður
- Karl Löve, öryrki
- Ásta Björg Tómasdóttir, öryrki
- Sigurður Þorri Sigurðsson, öryrki
- Ingólfur Daníel Sigurðsson, tæknimaður
- Jóhanna María Kristjánsdóttir, eldri borgari